Ranen på Dokka

Perfekt opp ranen på Dokka i dag

Straumsnes og Holmedal

...og Askvoll

...og inn Dalsfjorden

Perfekt morgontur opp ranen på Dokka i dag. Sol frå skyfri himmel. Nordadrag med nokre få plussgrader i lufta. Tørt og fint oppover. Litt snø høgst oppe. Flott utsikt til Dalsfjorden, Holmedal, Straumsnes, og Askvoll...😃 

Etter å ha toppa ut, gjekk så turen vidare nordvest til Kalderasnipa og fjelltrimposten her. Retur via Grønene. Nydeleg! 

Rivedals-posten

Utsikt austover frå Vardenova

Dokka, Kalderasnipa, Alden og Moldura m.m. i vest

Mot Dalsfjorden, Rivedal og Straumsnes m.m.
Vi ser Dokka, Moldura og Skålefjellet i Stongfjorden mot høgre

Skålefjellet, Toreheia og Ytrevågefjellet m.m
Osland Gard nede t.h.

I dag gjekk morgonturen til Vardenova. Fjelltrimposten som ligg mellom Rivedal og Osland. Ein post som eg kjem til å gå ein del på framover. Med sine 777 moh er toppen lett å sjå frå andre toppar der den ligg ganske fritt vest for Stordalen. 

Det er merka rute frå vassverket i Rivedal og over myra nordover til under Røyrbotnholten. Her oppe koplar stien seg på DNT-ruta til Nipebu frå Stongfjorden. Med ein liten avstikkar opp på sør- eller vestsida. Sistnemnde luftig. Ikkje heilt ufarleg når det ligg is og skare i skåra opp. Men det er sørsida som er merka med merkepinnar. Det er flott utsikt i alle retningar på Vardenova. 

Foto Vardenova 290421

Her ein video med stillbilder frå i fjor haust:

 

Knall morgon

Knall sol over flotte fjell...

Krokavatnet ligg blikkstille

Tilbake i Skorvemarka og fjelltrimposten på Markahengenipa i dag tidleg. Knall morgon. Knall sol. Og heilt vindstille på toppen. Ruta opp under Fossedalshengenipa er heilt snøfri no. Det ligg berre litt på nordsida. Perfekt skaresnø på det partiet i dag tidleg. Praktfullt! Sjå elles video. 

YouTube video link (mobil)

Årets første i joggesko

Fristadfjellet framme mot høgre -
der eg mellom anna var i går

I dag prøvde eg nye Inov8 joggesko på Kalderasnipa. Veldig lett. Og sat godt på. Men diverre har eg ikkje fått tak i GoreTex modellen av Roclite 315 som eg har brukt i mange år. (Eg kasta dei to gamle para som eg hadde att i fjor). Den nye 315-modellen er forsterka i sålen, meir stabil og betre haldbart mesh på enn tidlegare modellar. 

Vel, det gjekk som det måtte gå - eg vart våt. Men det var no berre rett opp å snu likevel. Og sola skein... Men eg lyt vel ta meg ei ny runde etter 315 modellen. Det er jo meir behageleg å vere tørr på føtene enn våt - spesielt når termometeret viser nesten minusgrader... Fordelen var likevel at eg i dag tidleg kunne gå oppå snøen, medan dei som gjekk i går kveld hadde sige godt gjennom... Kjekt å vere pensjonist...😎

TiTur og vårslepp...

Utsikt frå Fristadfjellet i dag 26/4

ds mot m.a. Dalsfjorden - 
Moldura, Kalderasnipene og Dokka t.v.

ds mot Straumen

I dag valde eg utganspunkt for turen på Nordeide. Langs fjorden til Fisma. Og opp det relativt bratte skaret frå Fisma og opp på Jamneheiane. Ei rute eg har brukt ein del før til Fismavatnet og Jamneheiane. 

Gamal steingard på Nordeide

Det er veldig fint her tidleg på våren når heile lia er pryda med kusymre (primle som vi sa i Dale). Rislande vatn langs hamrane, fint og grønt. Om våren er det ikkje så tilvokse heller. I dag var det i tillegg godt hjortetrakk opp heile skaret.

Kusymra blømer heile lia opp....

Frå toppen av skaret over Fisma -
Eidsfjorden og Nordeide -
Kalderasnipa og Dokka 

Frodig opp skaret

Isen var no smelta på Fismavatnet. Men det låg endå ein del snø i dei nordvende skråningane ned mot vatnet. Likeeins litt snø vidare opp nordsida til Smørkletten. På Jamneheiane var all snøen borte. Men så var det nordavinden då - såpass kald der oppe på morgonen at eg skifta alt tøy på overkroppen! Slik gjer jo underverk når ein er svettevåt.... 

Dagens selfie på Jamneheiane med Smørkletten t.v.

Frå Jamneheiane gjekk så turen ned stien til vestsida av vatnet og opp skaret mot Smørkletten. Så opp fjellet på nordaust-sida. Eit par foto her òg (har jo nokon frå før av då 😃) før turen gjekk vidare langs høgdedraget på austsida av Askdalen og til Kultingane inkl. fotostopp. Deretter vidare til Fristadfjellet. Ser det var veldig bra merka med merkepinnar ned att i dalen! Klart for TiTur Dalsfjorden 2021. 

Både Jamneheiane, Smørkletten, Kultingane og Fristadfjellet er med på 7-fjellsturen som går av stabelen 1.mai. Turleiar John Lien.  I tillegg til dei ovannemnde fjella er vel Blåfjellet, Eggene og Hjartåsen med òg. Fin rundtur dette på Askvoll-halvøya. 

Etter å ha vore på Fristadfjellet, gjekk så turen ned i dalen og til Askvoll. Stopp på Kiwi med Cola og Melkesjokolade. Olaug, som i dag har fri, henta meg. Så til Nordeide etter bilen og heim i dusjen.... Fin tur i sola.... 🌞🌞

Foto Fisma Jamneheiane Smørkletten Kultingane Fristadfjellet 260421

Tørt og fint, lett og greitt

Utsikt ved Toreheia

På vestsida av Toreheia er der fin utsikt til Krikavatna og Mangevatna.
Blåfjellet og Skylefjellet mot høgre.

Utsikt frå Yndestadhøgeheia mot Mangevatna, Blåfjellet og Skylefjellet

I dag tok eg nesten heile runda på fjellet her heime. Frå dørstokken opp lia og Selda til Yndestadhøgeheia. Deretter opp på Toreheia. Og så ned fjellet på nordsida til Skylefjellet og Blåfjellet. Retur via sørsida av Mangevatna og "Skylefjells-ruta" heim til Yndestad. Kjempeflott runde dette! I lett og ope terreng oppe på fjellet.  

Som dei andre dagane - delvis skya, glimt av sol og nordatrekk. I dag gjerne litt mindre vind enn dei andre dagane. Men framleis så kaldt av vasspyttane på fjellet var stivfrosne. Likeeins snøen som låg der oppe enkelte plassar. Elles tørt og fint. Lett og greitt. ca 4 timar. 

Med Øyvind og Marie på tur

Øyvind, Marie, Olaug, Peter og meg på Kalderasnipa i dag

Øyvind og Marie studerer turskiltet ved Vassverket

Mot Vikastølen med Dokka i bakgrunnen

Ved Kalderasnipa - Moldura t.v.

Retur med Dalsfjorden som utsikt

Nykshytta

Marie og Øyvind har vore heime på Yndestad i helga. Så i dag bestemte vi oss for å ta turen på Kalderasnipa frå Holmedal. Opp Grønene ruta. Med retur om Nyksvatnet og Nykshytta. 

Som dei andre dagane var vèret av den skiftande sorten. Kald nordavind på toppen då sola forsvann. Men ganske varmt i bakkane då sola kikka fram. Det ligg litt snø igjen oppe i høgda. Litt våt og litt skare om eit anna. Opp Grønene for det meste tørt. 

Etter å ha toppa ut gjekk vi så om Nyksvatnet og tok oss ein liten rast i Nykshytta. Fint. Her oppe var det også nokre andre folk. Og fleire turgåarar traff vi så på stien ned igjen til vassverket. Flott og kjekk tur! 

Ei skive og godt utsikt til Holmedal - her Peter, Olaug og Øyvind 

Kjekk pause på Nykshytta

Foto Kalderasnipa Nykshytta 240421 

To glimt av sol

Skaret opp til Fossedalshengenipa t.v. 
(det er ikkje toppen vi ser - den ligg lenger bak og høgare opp)

Klassisk - Blegja, Eitrenipa, N&S Kringla, Fossedalshengenipa

Skorvemarka

dagens selfie...

Etter eit oppdrag i Førde på nokre timar i dag, gjekk eg oppom Markahengenipa "på veg heim igjen". Med fjellklede i bilen er det greitt med eit byte av klede ved Markavatnet. I tillegg hadde eg med meg trugane. Dei hadde eg god hjelp i opp dalen nord for Fossedalshengenipa. Her låg det ein god del gjennomvåt sigesnø. Oppe på kanten av fjellet sette eg dei igjen. Ryggen utover mot toppen var for det meste snøfri. 

Elles var det ein skikkeleg sur nordavind der oppe i ettermiddag. Delvis skya, og to glimt av sol...😎 

 

Kaldt på Kalderasnipa

Smil til fotografen... 
(men det var iskaldt...😄)

Full vinter ved Kalderasnipa i dag tidleg

Dokka

Gårsdagen gjekk med til ein tur til Bergen med ekspressen frå Askvoll. Veldig flott å reise på denne måten. Sjølv i nordakuling. For det meste seglar ein jo innaskjers. Men over Sognesjøen og Fensfjorden var det litt sjøgang nokre minuttar. Eg såg såvidt innom Marie på Bergen Storsenter der ho jobbar som tannlege. 

I dag tidleg var eg tilbake på "Eidsfjorden-ruta" til Kalderasnipa. Hjortane eg hadde føre meg oppe i dalen hin dagen gjekk på same plassen i dag. Artig. I dag trekte dei opp og sør om Sørskaret nedanfor Eidselva. Her er det litt bjørkeskog heilt i skoggrensa. Hin dagen fòr dei motsett veg over fjellet vest om Eidsvatnet. 

Full vinter igjen i Holmedals-fjella

Og ja - det var kaldt på Kalderasnipa i dag. Rennefòk og full vinter egentleg. Det var kome nokre centimeter med nysnø, og ein iskald nordavind gjorde at det berre var å kome seg fortast mogeleg der i frå. Ned att same vegen til bilen ved Eidsfjorden. 

   

Tørt, fint og tilnærma snøfritt

Fin utsikt frå "Eidsfjord-ruta" til Kalderasnipa.
Her med hurtigruta i dag.

 

"Eidsfjord-ruta" til Kalderasnipa/Dokka
Foto frå Jamneheiane 28/5-20

I dag tidleg gjekk eg den flotte ruta frå Eidsfjorden til fjelltrimposten på Kalderasnipa. Tørt og godt opp bakkane. Berre litt snø somme plassar høgast oppe. Dette er ei veldig grei og kjekk ruta. Fint å velge ei anna rute enn opp frå Holmedal heile tida. For min del blir det òg mindre køyring. 

Tørt og fint opp bakkane frå fjorden

Elles hadde eg 6 hjortar føre meg oppe i bakkane i dalen. Dei såg meg visst frå då eg parkerte. Artig innslag. Dei har forresten laga ein god trassè øvst oppe som er lett å følge opp over hamrane.  

Ruta kryssar Eidselva

ds

Noko morgontrekk var det på toppen. Men du verda for ein fin temperatur. Sjølv klokka 10. Eg gjekk ned igjen same ruta til bilen ved fjorden. Fin morgonsyssel!

Vår i bakkane heime

Lått og løye med Tordis og Kjell på Blåfjellet

Litt trekk var her

Ved Mangevatna på veg inn att

ds

Blåfjellet ute t.v.

I dag gjekk eg opp igjen heime. I lag med Olaug. Det er så flott og vårleg i bakkane på Yndestad no. Tørt og snøfritt. Og kusymrene blomstrar opp gjennom lia. Litt kjekkare med vårkjensla slik enn å vabbe i snø. Nett før vi drog gjekk også nabo Kjell og Tordis opp lia.... 

Oppe på Rinda traff vi så Karen H. Ho kom frå Grimelia. Så vi slo av ein liten prat med henne. 

Ovanfor Svartevatnet bestemte eg meg så for å gå nordom Skylefjellet. Litt ekstra tur. For så å treffe Olaug igjen på Blåfjellet. Som sagt så gjort. Flott liten avstikkar dette. Ein liten halvtimes tid lenger. 

Klassisk motiv av Mangevatna frå "Skylefjells-ruta"

Vest på Blåfjellet etterpå sat så Olaug, Kjell og Tordis. Her hadde vi oss ei triveleg stund med lått og løye i det flotte vèret. Litt trekk var her. Men flott temperatur. Til Yndestad igjen gjekk vi kvar for oss. Nok ein nydeleg vårtur frå dørstokken heime.