Viser innlegg sorter etter datoen for søket atløy. Sorter etter relevans Vis alle innlegg
Viser innlegg sorter etter datoen for søket atløy. Sorter etter relevans Vis alle innlegg

fredag 30. oktober 2026

Tilbake på Blåfjellet i Askvoll

Dagens selfi

Skyer og skodde over Atløy og Alden i dag tideg

Sauesundet

Askvoll

Ja, det er ei stund sidan eg har vore oppom Blåfjellet i Askvoll. Men sidan fjellet no er med i programmet på fjelltrimmen, var det greitt å ta dagens trimtur opp hit. No var ikkje veret av det beste i dag tidleg. Grått, men vindstille og rundt 10 varmegrader. 

Frå parkeringsplassen ovanfor kyrkja bar det inn ved den flotte Presteelva. Her er det laga til flott grusveg til og med for rørslehemma. Frå brua bar det opp bakkane mot nord og vest. Det viste seg fort at det var gjennomblautt og sitla og rann vatn overalt. Og i dei bratte bakkane frå omlag halvveges oppover var det i tillegg sleipt. Men eg toppa no greitt ut i litt søraust vind. 

Var det glatt opp, var det sjølvsagt endå glattare ned igjen. Og rett på snørra bar det ein gong. Utan at det gjorde verre skade enn gjennomskitne klede. Jo, jo, det er haust i fjellet. Men trimmen var no i boks. Elles var det fleire på tur nede i Prestemarka. Når det er så flott tillaga som her triggar det også folk til å kome seg ut!

Under ligg bildekavalkade frå arkivet frå Blåfjellet i Askvoll - 
under gjerne litt betre forhold enn i dag...😃


søndag 18. oktober 2026

Sauesanking på Høgeheia

Ingebrigt, Roy, Arnljot, Vilde og Arvid

Rett vest av Høgeheia med utsikt til Atløy og Alden

På veg ned i Holevika

Eg vart med Roy og gjengen på sauesanking i Høgeheia traktene i dag. Vi starta frå Holevika i dag tidleg og gjekk der i frå opp bakkane til Høgeheia. Her delte vi oss litt strategisk til sidan vi visste at sauene gjekk i dalsøkka aust om toppen. Og for å møte dei slik at vi fekk dei på "kjøl" retning stien ned igjen i Holevika. Eg sjølv gjekk med Roy og Arvid B. med hundane sine. Etter litt fekk Arvid samla dei. Sauene tok nordsida av Høgeheia som vist på bilde 2. 

Sjølvsagt gjekk det fleire timar og litt att og fram før vi fekk sauene ned i innhegninga i Holevika. Men alt i alt gjekk det veldig bra. Så no gjenstår det å plukke ut vèrlamma og elles det som skal gå til slakt. Resten reknar eg med skal opp igjen sidan dei går ute heile året. Flott og sosial tur! Kjekt å kunne bidra med noko nyttig, og få fjellturen som bonus. Takk for laget!

Foto Sauesanking Høgeheia 181026

 

fredag 16. oktober 2026

Tørrskodd?

Dagens


Sola stakk gjennom i dag - her utsikt mot Granesundet i Askvoll - Atløy t.h.

Dagens Alden og Heggøy

Ja, det skal noko til å kome seg til fjells og heim att tørrskodd om dagen. Søkkblautt over alt! Og Furefjellet som eg var oppom i dag tidleg er ikkje noko unnatak. Gjennomvått, gjørme og sleipt underlag. Vel, vel bra og ha ei god vaskemaskin. 

Dette set sjølvsagt krav til gode sko frametter. For det tørkar ikkje opp no før det kjem frost. Og halvhøge sko (i det minste) er eit must. Elles er det fornuftig med gamasjar!  Ja, med noko anna på føtene blir ein søkk våt og gjørmete nede i skoa. Joggesko kan ein berre gløyme. 

Eg kom meg tørrskodd heim igjen i dag òg. Men dei beste og nyaste skoa måtte til. Elles var det faktisk opplett og delvis sol på turen. 8-10 grader og lett bris. Fin trim!

torsdag 8. oktober 2026

Bokslepp på Størdalsstauren


Størdalsstauren i soloppgang i dag tidleg - foto frå Mjåseth

Eg ser heim att til raudehuset vårt midt i bildet

Dagens selfie på Størdalsstauren

I dag tidleg var eg ut til Dag Tore Mjåseth og henta ny fjelltrimbok og metallboks som skulle utplasserast oppe på Størdalsstauren. Registreringane for den nye 26/27 sesongen startar 11.oktober. Dag Tore hadde sett opp merkepinnar for nokre dagar sidan. 2.oktober vart elles boka på Furefjellet lagt ut. Begge desse fjella er nærast for heimebane å rekna for oss i Stongfjorden. Frå sofakroken ser eg så fint over fjorden og opp på Størdalsstauren. 

Eg har jo gått ein god del på Størdalsstauren opp gjennom åra. Spesielt når fjellet kvart sjuande år har vore fjelltrimpost. Men det er vel ikkje til å underslå at dei bratte bakkane rett opp frå fjorden gjekk adskilleg lettare før i tida enn i dag (vel, ok er er litt forkjøla då 😅). Det var nemleg eit blodslit opp dei gjennomvåte bakkane. På slutten oppe på dei humpete terrenget vestover mot toppen gjekk det litt lettare då eg fekk sola i ansiktet 😎.

Utsikta frå Størdalsstauren er nydeleg (sjå video under frå i dag og samleserie). M.a. sørvestover til Jamneheiane, vestover til Alden, Hovden på Atløy og Heggøyna. Vidare Staveneset og Høgeheia. Inn Stongfjorden, heim til Yndestad og inn til sentrum. Osland ser ein i nordaust. Og mot søraust ser ein nordsida av Moldura. Elles er det fin utsikt over mot Toreheia i nord og øyriket i Florø. Berre for å nemne litt. 

No får vi håpa at mange hiv seg på den nye fjelltrimsesongen. Denne forma for fysisk og psykisk fostring er absolutt å anbefale å bli med på. God tur!



fredag 2. oktober 2026

Merketur på Furefjellet

Dagens selfi i havbrisen....😎

 

Furefjellet ligg ytst på Stavenesodden med utsikt til m.a. Alden og Heggøyna

...og Granesundet i sør. Vi ser Askvolfjella t.v. og Atløy t.h.

Fin merketur og rydding av stien til Furefjellet i dag. Fjellet er post på den nye fjelltrimmen for 26/27. Pinnar med raud måling er kome på plass. Og litt einer og busker ved stien er klipt.

Det er som regel friskt å kome ut til det ytste fjellet på fastlandet i kommunen. Sjeldan vindstille her. 


Stien til Furefjellet føl elles bakkane opp frå Holevika på same traseen som til Høgeheia. Men tek av frå denne rett nedom granfeltet og går vidare opp bakkane mot vest (Stien til Høgeheia går gjennom det vesle granfeltet og tek opp mot aust). No skal stien til Furefjellet vere godt merka for alle til å ta seg opp hit. Hugs likevel at det stadvis er noko blautt i terrenget oppe mot vest. Så småsko egnar seg ikkje. Trimbok er lagt ut. Men posten er gjeldande frå 11.10. 

God tur! 


lørdag 8. august 2026

Moldura

 

Frå toppen av Moldura med utsikt mot aust 

I dag held vi fram  rundturen i Askvoll fjella. Og frå Dokka går vi til Moldura, 826 moh. Fjellet kan vel seiast å vere nabofjellet til Dokka i nord.

Som med Dokka er det fleire ruter opp. Mest nytta er frå vassverket i Holmedal og via dagsturhytta og opp ura. Ein ka jun under toppen gå opp frå vestsida og. Her kjem ein også opp hvis ein går via Størdalen i vest. Sjølv har eg nytta mest ruta frå Stavsnes i Stongfjorden i nord. Elles er det fint å gå frå Holmedal via Tveit/Hålandsstølen og Fagredalen frå aust. I dag er ruta via dagsturhytta merka. Dei andre berre sporadisk. 

Det er nydeleg utsikt i alle retningar frå Moldura. Frå gamalt av sa dei at du kunne sjå 7 prestegjeld. Sjå biletfilm frå kommentarfeltet. Eg har i denne serien valt haust og vinterbilder då det er finast lys på denne tid. 

Foto 1 frå toppen mot aust. Blåfjellet, Blåfjellssåta og Bakkefjellet nærast. 

Foto 2 frå toppen mot vest etter solnedgang. Vi ser Atløy og Alden før det er heilt mørkt.


fredag 7. august 2026

Dokka

 

Morgonstemning: Utsikt til Straumsnes og Holmedal frå ranen på Dokka

No har vi vore innom Alden, Atløy, dei 7 fjella kring Askvoll sentrum og Bakkefjellet. Med same utgangspunkt som sistnemnde kan vi, etter mange sitt syn, ta turen oppom kanskje det flottaste fjellet i kommunen - nemleg Dokka.


Frå vassverket i Holmedal er det tre ruter opp. Via ranen i aust, opp Grønene ved Vikastølen eller oppom dagsturhytta ved Nyksvatnet. Greie ruter å kombinere opp og ned. Ein fin tur elles er å gå via Ringstadstølen i sør eller Eidsfjorden i vest. Mange ruter med andre ord. 

Stillbildeserie her

mandag 3. august 2026

Nære toppar rundt Askvoll sentrum

 

Ved Fismavatnet mellom Smørkletten og Jamneheiane

Utsikt frå Blåfjellet nær Askvoll sentrum.
Vi ser mot Lutelandet og Solund i sør. Sauesundet t.h.

Frå Alden og Atløy set vi kursen over Granesundet og tek turen til dei næra toppane mot nord for Askvoll sentrum. Årleg 1.mai er det såkalla 7 fjellstur til desse fjella. Dei er Blåfjellet, Siktanuten/Eggene, Hjartåsen, Steinheia/Smørkletten, Jamneheiane, Kultingane og Fristadfjellet. Kjære toppar har fleire namn😎

Som frå dei andre fjella i kommunen er det nydeleg utsikt. Og dei nemnde turane kan du sjølvsagt gjere så lange du vil. Til dei fleste toppane er det gode stiar og godt merka ruter. 

Bildefilm her: 

lørdag 11. juli 2026

Fullført stolpejakt i Askvoll og Fjaler

Olaug ved grillhytta på Eina i dag

Utsiktspunkt ved Hovden på Hellevika


I dag gjekk siste turen for å fullføre stolpejakta i Askvoll og Fjaler for Olaug og meg. Til det siste kartet i Ytre Fjaler. Her besøkte vi Stroka området ute ved Lammetun der siste stolpen stod ved grillhytta i nord mot Einingsneset. Deretter Grytøyra, Grytøyråsen og Furset. Så Kjøsneset og Kjøsnesåsen. Til slutt opp på Hovden på Hellevika. 

Askvoll har 4 område på årets utgåve av stolpejakta. Der Atløy har 43 stolpar, Kvammen, Stongfjorden og Askvoll 34, Rivedal, Holmedal 33 og Værlandet/Bulandet 30. Totalt 140.

Fjaler har 2 område. Der Straumsnes/Ytre Fjaler har 43 stolpar. Og Dale/Haugland har 23 stolpar. Totalt 66. Så då har vi fått scanna alle dei 206 stolpane i kommunane. Frå fjord til fjells, nokre lette postar andre meir krevjande. Artig er det å få sett stadig nye område. Og veldig kjekt å kunne gjere noko sosialt i lag. 

Så no er TiTur Dalsfjorden i boks. Og fulførte kart på stolpejakta i Askvoll og Fjaler. 

Som kanskje enkelte har fått med seg har vi gått ein god del stolpejakt i Indre Sogn, Skjolden, Hafslo, Luster, Veitastrond, Marifjøra etc. Framover blir slike utflykter meir som eit krydder når det passar seg slik. Sjølv vil eg gå meir på den vanlege fjelltrimmen i Askvoll no. Poenga i stolpejakta er eg ikkje så oppteken av. 

 Stolpejakt Ytre Fjaler 110726


tirsdag 16. juni 2026

10 av TiTur Dalsfjorden

10/10 på Storlifjellet


Hestebakken med fin utsikt til Straumsnes, Vårdal og Atløy

Godlynte kyr på Hestebakken

På hytta til Margaret og Agnar på Åsnes - 
med praktfull utsikt til Holmedal, Dokka, Moldura og Bakkefjellet

Avslutningsturen min nr 10 på TiTur Dalsfjorden gjekk i ettermiddag til Dale, Rakneberg og vidare til Storlifjellet. Det ligg sør av Jarstadheia. Med flott utsikt til Flekkefjorden og ytst i Dalsfjorden. Det var nydeleg ver. Temperatur til shorts og t-skjorte. Og god og veldig godt merka sti oppover. Steinlagt fleire plassar og med plank over nokre våte myrar. Fantastisk arbeid gjort av Dalekatane. 

Turen tok ikkje så lang tid, så Olaug og eg reiste ut til Straumsnes då det gjenstod nokre svarte stolpar på Stolpejakten som vi ikkje fekk med oss sist vi var der. Den høgste står på Hestebakken, som i fjor, med nydeleg utsikt ut Dalsfjorden mot Atløy. Her oppe gjekk det ein flokk med godlynte kyr. I granskogen og skuggen for sola.  

Ned igjen ved vegen stakk vi bortom Margaret og Agnar. Sidan bilen stod på tunet ved hytta. Vi fekk oss ein prat både inne og ute ved hytta. Fantastisk panoramautsikt til nordsida av fjorden. 

Så då var TiTur Dalsfjorden i boks for min del. Og kartet for stolpejakta på Straumsnes likeeins.  



mandag 11. mai 2026

TiTur post på Veten, Atløy

Her sit eg i veten på Atløy
i bakgrunnen ligg Hovden t.v. og Høgeheia på Stavenesodden t.h. lengst bak

Utsikt til Eidet og nord i Solund

I ettermiddag gjekk turen til Atløy igjen og til TiTur Dalsfjorden posten på Veten. Toppen ligg mellom Skålefjellet i vest og Skredvarden/Atløynipa i aust. Ein flott og grei tur opp frå Eidet med fantastisk utsikt (som det måtte vere frå vetar). Og som alltid på godt merka sti. Nydeleg vèr, men ein ganske så kald nordavind på toppen. 

Vetar er spanande stoff. Når ein rundt vikingtida sette fyr ved desse siktepunkta langs kysten, fekk ein i si tid varsla om komande farer som kom seglande. Eit effektivt varslingsystem langs heile kyststrekninga vår. Veten på Atløy er kjend. Og du kan lese om den på linken inn under frå Jul i Sunnfjord i 2014. Det som ikkje står i artikkelen er at det sannsynlegvis er ein vete på Høgeheia òg som eg kom over for nokre år sidan (dei meinte det inne på fylkesavdelinga). Og medan vi er inne på gamle kulturminne kan du Sjå blogginnlegg om fangstgrav på Blægja og link til vete på Høgeheia her. Og Vil du lese meir om historia til Veten på Atløy kan du sjå her.

 Fotoserie Atløy arkiv

søndag 10. mai 2026

Stolpejakt Herland (2), Høyvik og Sauesundet på Atløy

Ved gapahuken ved Herlandsvatnet


Herr Stenskvett er på stolpejakt òg - her på free campen ved Tvibyrgssundet

Olaug og eg tok andre turen på stolpejakt på Atløyna i dag. Og fekk med oss resten av stolpane vi mangla der ute. Den første turen med Håvard og Tiril, Marie og Øyvind og jentene kan du sjå bilder av her. (Også med linkar til flotte bilder og turar frå arkiv). Veret i dag var overskya med litt regn i lufta. Og ein ganske så kald nordaust vind. 

Turen gjekk først til Herland der vi fekk scanna inn resten av stolpane ut mot Tvibyrgssundet. Deretter køyrde vi tilbake til Sauesundet og parkerte bilen ved butikken. Og gjekk runda om idrettsbana og Nedre Grov og rundt. Så var det ny etappe til Høyvika. Her fekk vi med oss alle stolpane ut mot Rindane og til Herlandsvatnet. Så då var alle stolpane på Atløyna scanna. Totalt 43 her ute. På neste tur får vi håpe på litt varmare vårvèr enn i dag. 

Foto Stolpejakt på Atløy 100526

 

fredag 1. mai 2026

Nydeleg stolpejakt på Herland

Ein god matbit etter stolpejakta

Her er vi ved stolpen heilt i nord - fin utsikt til Alden

Tiril kosar seg på dei flotte berga vest på Atløy...
Kinn, Reksta, Skorpa og Store Batalden i synsranda.

...og dansar på ei flott bru eldsjeler har snikra - før dei tre bukkene Bruse kjem 😄

I dag reiste vi til Askvoll og tok ferja til Gjervik på Atløy. Vi det var Håvard & Tiril, Marie & Øyvind med Villemo og Tuva, Olaug og underteikna. Oppdrag - stolpejakt på Herland. Så vi køyrde ut på vestsida av øya og tok føre oss stolpane nordover langs kysten. Og som alltid før på Atløy var stien og merkinga heilt super. Blå gode merker som står tett. Ny plank utlagd over våte parti. Og heller somme stader. No har eg skrytt av merkinga, utlagde klopper og stein fleire gonger før på Atløy. Og nokre av dei finaste turane eg har hatt i kommunen har vore her ute. Sjå Creme de la Creme og ein TiTur link her. Merking er viktig - for som vi veit kjem havskodda veldig fort på ute ved kysten. Så det er ei stor sikkerheit at ein har utført så godt arbeid. På rein idealisme. Nok ein gong stor applaus til flinke eldsjeler👏

Elles må eg få nemne frå turen at småjentene til Marie og Øyvind var veldig flinke å gå. Dei gjekk omlag halve vegen nordover til Nordre Stølsvika der den siste svarte stolpen står. Det er nemleg eit stykke ut hit.Vi andre (sjå foto) heldt fram og fekk med oss alle stolpane før vi returnerte.  Vi hadde oss elles ein god matpause sør om Herlandsvatnet. Her står det ein god benk og bord. I det fine vèret var dette kjempeflott! 

Foto stolpejakt på Herland 010526

Arkivbilder frå Atløy 👇

torsdag 9. april 2026

TiTur Dalsfjorden og Stolpejakt - oppstart

Skylefjellet er post på årets utgåve av TiTur Dalsfjorden - her er det flott utsikt til dei flotte Mangevatna 
Bildefilm Skylefjellet her 

Frå Kalderasnipa er det flott utsikt til Askvoll fjella i vest 
Bildefilm Kalderasnipa(ene) her

Både TiTur Dalsfjorden og Stolpejakta  startar opp i kommunane Askvoll og Fjaler i helga. Askvoll kommune har lagt ut følgjande info på sine heimesider. 

"Løypene på Stolpejakten er varierte og familievennlege – frå sentrumsnære turar til naturskjønne rundløyper. Stolpane er mellom anna plasserte i Kvammen, Stongfjorden, Askvoll, Holmedal, Rivedal, Atløy, Værlandet, Bulandet, Dale, Haugland og Ytre Fjaler".

God tur og God jakt!


mandag 23. mars 2026

TiTur Dalsfjorden 2026

 

Via ruta frå Eidsfjorden til Kalderasnipa har ein fin utsikt til Askvoll

Kalderasnipa i midten sett frå søraust på veg til Dokka

Steiestølen frå ruta (Dyttinga) til Taket 

Frå Facebook sida til Titur Dalsfjorden kan ein lese følgjande:

Hei, lista til TiTurDalsfjorden 2026 er nå klar for å hente ned i ut.no og der vil de og sjå alle 10 registreringspunkta i kommunane våre. Lista og registrering i bøkene er satt fom 11 april og tom 11 september. Eg nemner her stadane samt lagar ein link slik at de kan hente dei opp her og. Her ser de turmåla, hugs at de og på dei fleste hente ned turforslag. Her er stadane:
Kallastølsfjellet/Kalvhagstølfjellet: https://ut.no/.../14689.../kallastlsfjelletkalvhagstlfjellet
Dersom spørsmål, ta kontakt
Helsing John Lien

Bildefilm Kalderasnipene

Bildefilm Skylefjellet