Juni i eigne bilder

Juni er på trappene - allereie! Finaste og lysaste tida. Vi får tru at juni gir oss meir smak av sommar enn kva mai har gitt oss i år. Iallefall ber bilda eg her har samla von om det! God helg 😄

Nydeleg på Taket

 

Eg vart med The Ladies på ein ny TiTur topp i ettemiddag/kveld. Nemlig på Taket på Steiestølen. Vi hadde jo ein flott tur nyleg lenger ute på sørsida 19.mai. Den finn du her. Veret var delvis skya. 10-12 grader og omlag vindstille. Av og til stakk sola gjennom òg. Så det vart ein nydeleg tur opp dit på godt merka sti. 

I gamle dagar gjekk vi mykje oppe i Seiestøl tkraktene. Både sommar og vinter. Fisking og skiturar. Veldig kjekt å kome tilbake hit då eg dei seinare åra har godt desidert mest på nordsida av Dalsfjorden. Takk til The Ladies for fin tur. Alltid kjekke turar dette då praten går livleg - og eg egentleg slepp å seie så mykje... 😎

Foto TiTur Dalsfjorden Taket 280526

Våt stolpejakt og kulturdag i Skjolden

Greitt å kome under tak 

Og jula varer heilt til ....

Utstilling Vår Verdsarv

Det hølgja ned då Olaug og eg gjekk Stolpejakt i Skjolden i dag tidleg. Opp ved Fortunselva og Vassbakken. 

Og seinare rundt sentrum. Her er det kulturdagar i helga. Uflaks med veret då. Men kjekt med korpsmusikk, boder og grillmat. Og mykje folk og bilar. Dette nokre ord frå mobil på blogg. 
 

Kjekke turfolk frå Florø

Flott gjeng frå Florø 

Magnar og meg

Vi fekk besøk i Stongfjorden i dag. Ein flott gjeng på 14 turdeltakarar hadde teke turen frå Florø for å gå på Høgeheia og Furefjellet på Stavenesodden. Dette i regi av Flora Turlag. I det høve fekk eg ein førespurnad frå Signe Nordvik for ei stund sidan om eg kunne orientere litt om Stongfjorden si kulturelle historie. Knytt opp mot dagen i dag. Så eg allierte meg med Magnar Vie. Han kan meir om bygda enn ein innflyttar som meg (ok - eg har budd her i snart 30 år då 😄).

Som vi alle veit er Stongfjorden særs rik på historie. Spesielt når det gjeld industrireisning som den første aluminiumsindustrien i landet, kraftutbygging og etablering av fagforening. Og med eit uttal av lag og organisasjonar. Første fotballbana av gras i fylket og tennisbane. Ja, på det tidspunktet var her mykje folk i bygda. Faktisk fleire enn i Førde! Og den rikdom som prega bygda i "gamle dagar" gav godt rykte rundt omkring.  

Før turlaget køyrde ut i Holevika hadde Magnar såleis eit føredrag om historia til bygda. Supplert med nokre innspel frå meg. Og til slutt vart det mange innspel, så tida gjekk altfor fort 😊Ja, det vart ei reint triveleg stund ved Grendahuset. Og det tok lenger tid enn planlagt. Når sant skal seiast kunne vi sikkert ha blitt sittande der endå😀. 

Når det galdt turen vidare tok turleiar Signe Nordvik seg av resten. Ho er kjend i traktene og har vore på Høgeheia tidlegare. Så eg "slapp" i dag. Men før vi skildest tipsa eg dei om turen til Skylefjellet. Og køyrde difor først ut på Yndestad for å vise dei kor turen startar ved skiltet ved riksvegen. Her er det godt merka vidare oppover. Fleire sa dei ville prøve denne turen seinare. 

Ja, dette vart ein veldig kjekk start på ein vanleg onsdag i mai. Håpar på gjensyn. Takk for møtet!

TiTur Hellevikåsen og Kalvhøgstølfjellet

Eg vart med the Ladies (sjå foto) på ein liten TiTur ekspedisjon på sørsida av Dalsfjorden i kveld. Vi har visst snart tradisjon på denne turen. Så vi tok 15.10 ferja frå Askvoll. Først til Gjervika så til Fure. 

Første stopp var Hellevika. Og vi fekk parkere ved Rune Berge sitt lager eit stykke frå der stien tok oppover furuskogen. Fin og lett tur på god sti. Bra merka. Her oppe fekk vi på oss ei lita regnbyge. Men det vart ikkje vått i terrenget. 

Neste stopp var på Gjølanger. Her gjekk vi opp ein lengre skogsveg. Som deretter vart til god og godt merka sti til Kalvhøgstølfjellet (må innrømme at namnet skaper meg litt bry). Så dermed fekk vi sjekka ut to postar på årets utgåve av TiTur Dalsfjorden. Takk for turen!

Lista på TiTur Dalsfjorden finn du her.

Foto Kalvhøgstølfjellet 190526

The special one

Goodbye - you`ve done your deal 

Det fekk nesten litt metaforisk tyding då eg sa farvel til mi gamle Paramo-bukse etter dugnaden på Stangfjord kulturkapell i dag. For dette vart siste reise for buksa. Den hadde tent meg godt i mange år. Og kva passa vel ikkje betre enn at siste turen vart her ved den gamle kyrkja. Ja, og så på Kristi Himmelfartsdag. Ja, no kan eg minnest denne buksa med glede. The special one 😃 

TiTur Bjergastølen

Selfie på Bjergastølen i ettermiddag

Dale i lett duskregn 

Inn mellom stolpejakt og tur til TiTur posten på Veten booka eg i ettermiddag inn på TiTur posten på Bjergastølen. Som det ligg i namnet ein av ti på årets mål i år. Turen gjekk den mest brukte ruta frå Otterstein og opp. Først gjennom granskogen mot Fossevikja og deretter opp bakkane mot vest. Dette er same ruta som ein nyttar til Eikenesstølen og Fløyen og Heileberget. 

Det var litt regn i lufta og vindstille. Grei tur. Sjølv om eg personleg ikkje er så glad å gå i granskog. Men dette er jo nødvendig for å kome seg opp her på nordsida av Dalsfjorden (om ein ikkje tek båt til Fossevikja). 

TiTur post på Veten, Atløy

Her sit eg i veten på Atløy
i bakgrunnen ligg Hovden t.v. og Høgeheia på Stavenesodden t.h. lengst bak

Utsikt til Eidet og nord i Solund

I ettermiddag gjekk turen til Atløy igjen og til TiTur Dalsfjorden posten på Veten. Toppen ligg mellom Skålefjellet i vest og Skredvarden/Atløynipa i aust. Ein flott og grei tur opp frå Eidet med fantastisk utsikt (som det måtte vere frå vetar). Og som alltid på godt merka sti. Nydeleg vèr, men ein ganske så kald nordavind på toppen. 

Vetar er spanande stoff. Når ein rundt vikingtida sette fyr ved desse siktepunkta langs kysten, fekk ein i si tid varsla om komande farer som kom seglande. Eit effektivt varslingsystem langs heile kyststrekninga vår. Veten på Atløy er kjend. Og du kan lese om den på linken inn under frå Jul i Sunnfjord i 2014. Det som ikkje står i artikkelen er at det sannsynlegvis er ein vete på Høgeheia òg som eg kom over for nokre år sidan (dei meinte det inne på fylkesavdelinga). Og medan vi er inne på gamle kulturminne kan du Sjå blogginnlegg om fangstgrav på Blægja og link til vete på Høgeheia her. Og Vil du lese meir om historia til Veten på Atløy kan du sjå her.

 Fotoserie Atløy arkiv

Stolpejakt Herland (2), Høyvik og Sauesundet på Atløy

Ved gapahuken ved Herlandsvatnet

Herr Stenskvett er på stolpejakt òg - her på free campen ved Tvibyrgssundet

Olaug og eg tok andre turen på stolpejakt på Atløyna i dag. Og fekk med oss resten av stolpane vi mangla der ute. Den første turen med Håvard og Tiril, Marie og Øyvind og jentene kan du sjå bilder av her. (Også med linkar til flotte bilder og turar frå arkiv). Veret i dag var overskya med litt regn i lufta. Og ein ganske så kald nordaust vind. 

Turen gjekk først til Herland der vi fekk scanna inn resten av stolpane ut mot Tvibyrgssundet. Deretter køyrde vi tilbake til Sauesundet og parkerte bilen ved butikken. Og gjekk runda om idrettsbana og Nedre Grov og rundt. Så var det ny etappe til Høyvika. Her fekk vi med oss alle stolpane ut mot Rindane og til Herlandsvatnet. Så då var alle stolpane på Atløyna scanna. Totalt 43 her ute. På neste tur får vi håpe på litt varmare vårvèr enn i dag. 

Foto Stolpejakt på Atløy 100526

 

På Solsidevegen

Geitene beiter ved Solsidevegen

 

Litlevatnet og Skålefjellet t.h.

Bilde 1: På Solsidevegen og på Stolpejakt i Stongfjorden kan du oppleve geiter med killingar. Dei beiter i området og er tamme. Dei hjelper på attgroing av landskapet. 

Bilde 2: Ved Litlevatnet og ved Demma er det fleire stolpar ein kan scanne. Eit idyllisk område ovanfor bygda. 

Lett stolpejakt i Dale

På stolpejakta i Dale går ein forbi Borgen og Lassedammen på Bjerga

Stolpejakta i Dale er laga for alle. 11 greie stolpar er plasserte ut til å scanne. Også rullestolbrukarar kan ta seg fram løypa frå sentrum og via gamlemoloen, Bjergelandet og Longehogen. Absolutt å anbefale for store og små, pensjonistar og rørslehemma til å kome seg ut ei lita runde på tur. Flott laga til med info for kvar stolpe på appen. 

Stolpejakta er eit veldig bra initativ av arrangør Værlandet Il i samarbeid med Askvoll og Fjaler kommune. Du kan elles registrere deg på stolpar over heile landet. 

Flott stolpejakt på Haugland

Olaug på Storåsen

Flotte nye bruer på Haugland

Og vi kom over ein leir for barnehagen vest av Stormyra

Ut på dagen i dag, og etter at Marie og Øyvind og kidsa var reiste, køyrde Olaug og eg til Haugland for stolpejakt. I nydeleg vèr, men med ein ganske så kald nordavind. Vi tok sikte på å ta den lengste turen til Storåsen først. Her står det ein svart stolpe (hovudbilde). Heilt supert opp gjennom bakkane. Først på tørr skogsveg og lenger oppe over Stormyra på tørt skogsterreng. 

Etter at vi var komme opp her og scanna stolpen, gjekk vi ned att same vegen til Stormyra. Her gjekk vi så vestover til ein raud stolpe som stod i krysset mot Pollaneset og Røbua. På veg utover kom vi over ein leir for barnehagen (sjå bilder). Artig! Deretter gjekk vi inn til Becker-huset der vi hadde parkert. Her inne åt vi nista med nydeleg utsikt til Hauglandssenteret. Så gjekk vi heile runda rundt Haugland og scanna stolpane her. 

På veg heim stakk vi oppom broder Leif-Arne og Anita som bur i Flekke. Dei var heime og vi fekk servert både kaffi og kake. Kjekt!  

Foto Stolpejakt på Haugland 030526

Nydeleg stolpejakt på Herland

Ein god matbit etter stolpejakta

Her er vi ved stolpen heilt i nord - fin utsikt til Alden

Tiril kosar seg på dei flotte berga vest på Atløy...
Kinn, Reksta, Skorpa og Store Batalden i synsranda.

...og dansar på ei flott bru eldsjeler har snikra - før dei tre bukkene Bruse kjem 😄

I dag reiste vi til Askvoll og tok ferja til Gjervik på Atløy. Vi det var Håvard & Tiril, Marie & Øyvind med Villemo og Tuva, Olaug og underteikna. Oppdrag - stolpejakt på Herland. Så vi køyrde ut på vestsida av øya og tok føre oss stolpane nordover langs kysten. Og som alltid før på Atløy var stien og merkinga heilt super. Blå gode merker som står tett. Ny plank utlagd over våte parti. Og heller somme stader. No har eg skrytt av merkinga, utlagde klopper og stein fleire gonger før på Atløy. Og nokre av dei finaste turane eg har hatt i kommunen har vore her ute. Sjå Creme de la Creme og ein TiTur link her. Merking er viktig - for som vi veit kjem havskodda veldig fort på ute ved kysten. Så det er ei stor sikkerheit at ein har utført så godt arbeid. På rein idealisme. Nok ein gong stor applaus til flinke eldsjeler👏

Elles må eg få nemne frå turen at småjentene til Marie og Øyvind var veldig flinke å gå. Dei gjekk omlag halve vegen nordover til Nordre Stølsvika der den siste svarte stolpen står. Det er nemleg eit stykke ut hit.Vi andre (sjå foto) heldt fram og fekk med oss alle stolpane før vi returnerte.  Vi hadde oss elles ein god matpause sør om Herlandsvatnet. Her står det ein god benk og bord. I det fine vèret var dette kjempeflott! 

Foto stolpejakt på Herland 010526

Arkivbilder frå Atløy 👇