Ingen app

I dag gjekk eg turen over Toreheia og Skylefjellet igjen. Returen langs Mangevatna. Ei fast rute eg brukar - som sikkert mange veit...😃

Overskya vèr med gløtt av sol, men kald austatrekk. Nei, det var ikkje særleg varmt der oppe. Og vasspyttane var frosne til i løpet av natta... Men trimturen fint i boks. 

Skylefjellet er post på TiTur Dalsfjorden frå 10.mai
Her med utsikt til dei flotte Mangevatna i dag.

Elles var det notert nye namn i begge bøkene sidan sist eg var oppom. Kjekt. Spesielt på Toreheia der heile namnerekkja mi no var broten...😎 Ekstra kjekt! (Kanskje reklamen min virkar - litt). Verre var det at boka var blitt våt... Så då får eg ta med meg opp ei ny. Toreheia er ikkje nokon "offentleg" trimpost med app registrering. For turfolk er det uansett kjekt å skrive seg i ei bok. App eller ei. Smitte, og smittsomt med folk, er her uansett ikkje.... 

Foto Toreheia Skylefjellet 300420

Litt fisk og litt til

Ved Fismavatn i dag.
Smørkletten oppe t.v

Jamneheiane

Utsikt austover ved Fismavatn
Kalderasnipene og Dokka t.h.

Nordeide
Kalderasnipene og Dokka bak

Furefjellet og Høgeheia,
Staveneset og Underset

Askvoll

Høyvikneset og Kviteneset
Alden, Værlandet, Tvibyrgje og Raudøyna

Etter ein tur hjå Askvoll Fysioterapi i dag tidleg, gjekk eg inn Askdalen til Fismavatn. Her gjekk eg rundt vatnet og drog meg 4 kjø til middag. Eg er måtehalden såleis. Så gjekk eg opp bakkane til Jamneheiane for utsikta sin del. Det er ikkje så langt opp når du er komen fram til vatnet. Så gjekk eg turen ned igjen, opp skaret i sør, og ein snur oppom Smørkletten (sjå video). Etter nydeleg ver på morgonen, var det no drege over med skyer og litt vind. 

Fin tur i Askdalen. 

Foto Fismavatn Jamneheiane Smørkletten 280420

Nydeleg vårdag i Fossedalen

Nydeleg i Øvre Fossedal i dag

ds

I dag tidleg køyrde eg til Skorvemarka og gjekk første delen av DNT-ruta til Nipebu om Krokavatnet og til Fossedalshengenipa. Der i frå via Svartetjerna og Grøndalen sør til Øvre og Nedre Fossedalen og til Otterstein (sjå GPX-fil på kartet nederst). 

Det var ein nydeleg morgon. Knallblå himmel. Og sol! Med nokre varmegrader i lufta. 

Første snøen låg i hellingane over Krokavatnet. Vatnet er no forøvrig isfritt. Opp heile ryggen mot aust ligg det framleis snø. Her får no sola fort tak. Noko som i dag gjorde snøen delvis blaut. På vestsida mot toppen ligg det parti som er unnasols. Her var snøen knallhard etter ei frostnatt. Eg tok på broddane heilt nede i botnen av ryggen. Der ruta opp tek av frå den merka ruta til Nipebu. Her låg det òg knallhard snø i skuggen. 

Det er sjølvsagt litt tungt å gå bratt oppover i sigesnø. Men no er ikkje ryggen opp så veldig lang då. Den er vel ca 300 hundre meter opp. Så sveitten kom fort på... 

Det var nydeleg på toppen (sjå video). Og nordavinden hadde framleis ikkje fått særleg tak så tidleg på dag. Langevatnet ved Nipebu framleis med is (sjå foto).

Det vårast ved Nipebu, men Langevatnet ligg framleis med is....

Eg sprang så ned igjen sigesnøen til botnen av ryggen. Gjekk så ned sør til Grøndalen og via Svartetjørna til kloppa på Krokavatnet. Det låg delvis ròten snø, kombinert med hard i skuggane, men det gjekk helt fint å ta seg ned til vatnet. Her i frå og resten av vegen til Dalsfjorden er det snøfritt. 

Øvre Fossedal med dagens sefie

Eg såg ikkje folk i Øvre, men alt såg fint ut. Og sola skein frå ein knallblå himmel over den flotte Kringla. Så tusla eg meg sørover langs vatnet i praktfull idyll. Vatnet spegla seg blått i blått. Vassenden var veldig fin i dag. Passe stor og skinande i sølv i sola. 

Nedre Fossedal i dag

I Nedre Fossedalen traff eg dei første turgåarane for dagen. Og der i frå til Otterstein var det reine folkestimen. Ja, eg traff folk overalt (eg nesten i feil "køyreretning"). Nesten berre ungdommar! Og ei jente i berre singletten stakk opp stien til Brendeheiknappen (det var då eg fann ut det var på tide å ta av meg gamasjane...). Men noko fotografering og sosialisering vart det ikkje til (du veit eg er ein eldre "gubbe"). Unnataket var då eg traff ein gamal kjenning frå Dale som eg ikkje hadde snakka med på 40 år! Hvis du les dette Kaj-Espen, så kom eg på etter at eg hadde snakka med deg, at vi piskatre har lege i telt i lag i Gunnhildvika ved Fossedalsvatnet ein gong i vår pure ungdom. Rart kva ein minnest i gamle fòtefar.... Eller i Fossedalen - i grøne far!

Tjoka fullt på parkeringsplassen på Otterstein i dag...

Herlig tur dette. Og ei nydeleg rute som fleire burde prøve. Og om du ikkje veit det er det fint å gå austsida av Krokavatnet òg. Om du har lyst å gå turen nord/sør frå Førdefjorden til Dalsfjorden ein gong. Eller omvendt.

Og så gjekk spaserturen min vidare over brua til Dale. Tid for skillingsbollar og kaffi på Allmuen. Før Peter kom og henta meg. Og Olaug på fruetur til Nipebu tok med bilen heim igjen frå Skorvemarka. Perfekt!

Panorama Dale

Foto:

Skorvemarka Fossedalshengenipa Fossedalen Otterstein 250420

Ruta Markavatnet/Fossedalshengenipa/Fossedalen/Otterstein 

"Dronninga" av Stongfjorden

Dagens selfie...😂

Stongfjorden

Panorama
Dokka, Moldura, Fanafjellet, Størdalsstauren, Høgeheia og Stongfjorden

 

Ved ruta via Skålefjellsvatnet

Ved andre elva

Foto Skålefjellet (Stongfjorden) 230420

I dag gjekk turen inn i Gjerdedalen og opp Brekka til Skålefjellet. På starten av DNT-ruta frå Stongfjorden til Nipebu. Det låg ein del skodde på morgonen. Den rekna eg med ville lette. Så eg utsette turen oppover eit par timar. 

Skålefjellet låg framleis i skodde då eg starta. Men etter å ha kome eit lite stykke opp i Brekka, såg eg det letta. Som tenkt. Det låg ein del snø opp den bratte bakken ved hammaren på ruta opp ved første elva. Delvis skare og frose på. Men over sjølve hammaren var det snøfritt. Så det gjekk greitt. (Ofte er det uråd å kome opp her om vinteren). I bakkane ovanfor var det delvis snø og avblesne fjellnakkar. Her hadde sola allereie laga slush av snøen, så i somme parti seig eg godt gjennom snøen. Ganske slitsomt når det er så bratt som her. Så eg måtte ta meg ein pust i bakken... Men opp over siste partiet var snøen framleis relativt fast (omlag ved første videoen og nedanfor). 

Perfekt på toppen. Skodda hadde letta heilt. Men den låg framleis over Førdefjorden og ute på Stavenesodden. Og stod som ein vegg ute i havet. Disen i lufta gav såleis ikkje heilt klåre bilder.... 

Etter å ha knipsa nokre foto og ein video, ete ein kvikklunsj og skifte nokre sveittevåte klede, gjekk eg ned igjen den andre ruta via Skålefjellsvatnet. Her var snøen godt blaut. Denne ruta knyter seg så på DNT-ruta i Mannskaret. Eg gjekk så ned igjen denne (sjå kart under). Flott tur! 

Nydeleg opp ranen på Dokka

Holmedal og Straumsnes

Askvoll

Dalsfjorden

Dagens selfie

Nykshytta er ikkje lett å sjå når du kjem frå Dokka....

Flott bru over elva frå Nyksvatnet

Utløpet av Nyksvatnet

Vikastølen

Etter ein time hjå fysioterapeuten i Askvoll i dag tidleg, køyrde eg inn til Holmedal i 9.30 tida for ein rundtur over Dokka. Kleda låg klar i bilen... eg trur ikkje noko såg meg i trusa ved vassverket... 😎 Så ein fantastisk fin tur opp ranen i morgonsola. Holmedal og Straumsnes spegla seg i morgonsola. Dalsfjorden blank og flat som ei pannekake. Ja, eg kom på vårversa eg skreiv til fjorden for nokre år sidan. "Lukka av vår" - Versa som ligg på den "sovande" diktbloggen min. 

Det låg litt snø øvst oppe på ranen. Her eg måtte snu i vinter. Då eg ikkje tok sjansen på å klatre opp og over den bratte hammaren her. Isete som det var. I dag var det derimot våt snø som låg her og såleis ingen problem med å ta seg opp.

Det var nydeleg på toppen. Vindstille. Og jakke fekk eg ikkje bruk for. Ja, som aprildag kunne det ikkje bli betre. Dokka har som vi veit fantastisk utsikt. Film her og her. 

Eg gjekk så ned bakkane mot nord til Nyksvatnet. Det låg delvis litt blaut snø her òg. Eg var ikkje oppom Nykshytta, men gjekk direkte til vassverket igjen. For på programmet står òg ein tur til Dale for litt jobb hjå mor mi på denne fantastiske dagen. 

Foto Dokka 220420

Fantastiske Atløyna - Creme de la Creme

Ja, eg måtte ut dit. I det strålande vèret. Havblikk mot ytste havet. Det funka perfekt. Som tenkt.

Ferja frå Askvoll 08.15 - akkurat passe. 10 minutt med ferja til Gjervik. Det toler dei fleste. Og deretter 10 minutt køyring til Eide. Der startar ei av rutene til Skredvaren/Atløynipa/Skålefjell. Der i frå og opp på Skredvarden. På kjempegod sti. Deretter sør til Atløynipa. Så ned  igjen i "krysset" der ruta frå Skålefjell møter den frå Eide. 

I det nydelege vèret bestemte eg meg like godt for å gå nordvest til Skålefjell òg. Og så ned til vegen aust for Brurastakken. Aberet var sjølvsagt at eg måtte gå heile vegen til Eide der bilen stod. Ikkje det. I det perfekte vèret var det jo ein flott tur det òg. Med havblikk og nydeleg utsikt til Alden og øyane sør om. 

Eg har skrytt av merkinga av turstiane på Atløyna tidlegare. Det er berre ein real fornøyelse å gå her ute. Flott varda og blå merke å gå etter. Ja, det er bort i mot komplett umogeleg å rote seg vekk. Og sjølv om eg ikkje har gått her i skodde, ser eg at merkinga er så tett at det funkar i dårleg sikt òg. 

Utsikta er formidabel. Frå alle tre toppane. Havet låg blikkande stille vestover til Alden, Bulandet og Værlandet. Nordover til øyane i Florø like stilt. Inn Stongfjorden. Til Askvoll. Og sørover til Lammetun/Solund/Gulen. Og eg tenkte på den lange turen Agnar og eg gjekk inne i Haukedalen i haust der vi såg godt ut til Atløynipa. I dag var det veldig gildt å kunne sjå inn att i Blegja, Storehesten og dei same fjella. I motsett retning. 

Elles fortel vel bilder og videoar sitt. Takk igjen til Atløyna. Du leverer. Perfekt. Med nydeleg terreng, merking og utsikt! Eit must for alle! 

Foto Skredvarden Atløynipa Skålefjell 210420

GPX fila mi var smitta av koruna i dag...
(😃)

Å vandre i eit måleri

Sillan og Tone på Blåfjellet i Grimelia i dag

Ved Yndestad i dag -
skiltet til Skylefjellet står utanfor høgre bildekant

Stongfjorden -
Yndestad nede til høgre

Ved Mangevatna i dag
(snart grønkast det)

Mangevatna frå Skylefjellet

Det er trimbok på Skylefjellet i dag -
registrering på TiTur-Dalsfjorden derimot vil skje via DNT sjekk ut appen
Opning 10.mai

På veg vestover til Blåfjellet -
Skylefjellet bak t.v.
Toreheia i det fjerne i midten bak

 

Austover langs Mangevatna

Det var i grunn litt rart i dag tidleg. Eg hadde nemleg tenkt meg avgarde å merke opp igjen ruta til Skylefjellet då det tikka inn ei melding frå broderen i Dale om det var snøfritt opp dit. Og det er det jo. Artig at vi tenkte på den same turen på likt. 

Som vanleg er det alltid mindre snø på fjellet på sørsida av fjorden enn på nordsida. Det har med fjord, havluft og solinnstrøyming å gjere. Så då vart det til at eg starta tidleg å merke, for så etter ca tre timar treffe broder Sigvard og svigerinne Tone på toppen av Skylefjellet. Etter å ha venta ein god halvtimes tid i den solvarme lyngen. Det var veldig kjekt. Og vi måtte jo fline litt av samanlikninga av vèret sist Sigvard var med meg på tur her. For i dag var det praktfullt! Knall sol og vindstille! 

Eg ventar på Sillan og Tone

Etter at dei fekk seg ein liten pause, gjekk vi så turen ut om Blåfjellet i Grimelia òg. Dei hadde ikkje vore der før. Det er ikkje så langt. Som bonus får ein då oppleve den praktfulle turen inn igjen på sørsida av Mangevatna. Med Toreheia og Yndestadhøgeheia midt i mot. Og i sør Skålefjellet og Moldura. På Blåfjellet hadde vi oss ein god matpause med skiver, kaffi, sjokolade, bananer etc. Drøsen gjekk der vi sat i den tørre lyngen. 

Ein god pause på Blåfjellet med øyane i Florø i bakgrunnen

Som eg tenkte meg lovpriste Sigvard og Tone området. Dette med indrefilet er i grunn eit litt klisjeaktig utrykk. Men nordsida av Stongfjorden er i grunn "the best there is". Rett utanfor nòva... Turgåarar som aldri har vore her oppe før har mykje å sjå fram til når denne posten opnar 10.mai på TiTur-Dalsfjorden. Å gå i dette området for første gong må vere ein av dei flottaste turopplevingane denne sesongen. Så god tur på Skylefjellet. Merka, klappa og klart. Start ved skiltet i Stavenesvegen på Yndestad i Stongfjorden.

Foto Skylefjellet Blåfjellet 190420

Video eldre bilder Skylefjellet:

Video eldre bilder Krikavatna og Mangevatna: