tirsdag 7. februar 2023

Ta med familen til Nykshytta

Påskestemning på Nykshytta

Det ligg fleire turbøker på hytta


Fin utsikt til Dalsfjorden, Holmedal og Straumsnes

Ein annan post på årets utgåve av TiTur Dalsfjorden, er Nykshytta i Holmedal. Oppstart 1.mai.

Beskrivelse og kart ligg på ut.no Det er god parkering ved vassverket. Turen hit er ein grei tur for liten og stor. Perfekt som familietur. Solvendt ligg hytta til mot sør. Flott utsikt til Dalsfjorden. 

Rundt Nykshytta har vi elles mange fine fjell som ein kan nå på same turen. Mest kjende er Dokka og Moldura. Kombinasjonsturen via Hålandsstølen er anbefalt. Turen er elles fin å gå heile året, uavhengig av TiTur. 

Panorama: Utsikt frå ruta mellom Kalderasnipa/Dokka og Nykshytta

søndag 5. februar 2023

TiTur til Straumsnes

Foto: Med Agnar på tur Straumsnes rundt

Flott utsikt innover Dalsfjorden frå Arsteinheia
Vi ser Heileberget med Driveknolten og Fløyen.
Mot høgre m.a. Blegja, Laukelandshesten og Storehesten 
...og Dalsfjordbrua. 

Ja, så blir det anledning til å gå TiTur Dalsfjorden på Straumsnes i år òg. Her er det mange flotte toppar. Årets post ligg på Arsteinheia, 449 moh. Info ut.no her. 

Frå Arsteinheia er det nydeleg utsikt innover Dalsfjorden. Og utover fjorden. Vi ser Vårdal og Holmedal og kjende fjell i vest og nord. Lammetun og Gjølanger på sørsida. Havet speglar seg vest i synsranda. Sjå foto. 

Dette blir nok ein fantastisk flott tur på årets TiTur. Det er berre å gle seg... 😄




lørdag 4. februar 2023

På Taket (eller kor e åra blitt av...)

Med Olaug og "berre ein hund"


Steiestølen-
Storehesten i bakgrunnen

Myklebuststølen (2017) -
på ruta til Taket 

Ja, så skal vi på Taket igjen. Ikkje her heime. Men på Steiestølen i Dale. Nok ein post på TiTur Dalsfjorden til våren. Tidlegare i veka har eg skrive om Yndestadhøgeheia, Fossedalsvatnet og Skålefjell som postar. I tillegg til desse, og Taket, vert det 6 andre postar på begge sider av fjorden. Dette vert spanande og kjekt. Og ikkje minst sosialt😄

Sidan eg flytta til hi sida av Dalsfjorden, og vel så det, så er det ikkje så mykje eg har gått på Taket. Faktisk er det TiTuren som har gjort til at eg har bevega meg i Steiestøls-traktene i det heile siste åra. (Synd og skam). Det har no mest blitt turar på nordsida av fjorden. Men i barne og ungdomsåra gjekk eg ein heil del i fjella på Steiestølen. Både sommar som vinter. Spesielt om sommaren då eg og Nils Chr. fiska "overalt".... Gjerne ei veke kvar sommar. Med overnatting i telt. Veldig kjekke minne! Ein broten ankel på slalåmski oppe i Seciliebotn, var ikkje fullt så kjekt. Og som ei mare nokre overnattingar på Høyanger sjukehus. Med 3 månader i gips opp i lysken! Vel, vel. Nok om det..... 😯

Taket ligg med GPS, turbeskrivelse og kart på ut.no så det treng vel ikkje takast att her. Men eg fekk eit lettare sjokk då eg såg bilda frå sist eg var her - i 2017.... Eg får avslutte med dagens klisje - kor e åra blitt av 😄

Foto Taket 190817

fredag 3. februar 2023

Hipp hurra for TiTur til Atløyna i sommar

Motiv ved Skålefjell på Atløy


Så blir det tur til Atløyna under TiTur i år òg. Så er sagt. Nærmare bestemt til Skålefjell. Herleg! Ja, for det er eit Skålefjell her òg. Som i Stongfjorden. 

Eg har skrive fleire stykke der eg har skrytt av fjell og merking av turstiar på Atløyna. Her ligg det fleire linkar. Og her.

Elles ligg Skålefjell med kart og beskrivelse på ut.no Du kan frå høgda ved nedkøyringa til Herland. Det står skilt ved vegen. Eller du kan gå frå Eidet der det òg er skilta. Det finaste er sjølvsagt å gå opp den eine ruta og ned att den andre. Eineståande flotte begge rutene. Ytst her ute i havgapet. Og som sagt det er godt merka overalt. Applaus!


onsdag 1. februar 2023

Ryktebørsen går...

Vassenden på Fossedalsvatnet.
Øvre Fossedal t.v.
Eitrenipa, Nordre og Søndre Kringla i bakgrunnen


Turmål ikring Fossedalen
Fossedalsvatnet midt i bildet.
Foto frå Nonsholten på Heileberget.

Det går handfaste rykter om at Fossedalsvatnet òg er eit av måla for TiTur Dalsfjorden i år. Oppstart er 1.mai. Som eg reklamerte for Yndestadhøgeheia i går, så er Fossedalen og Fossedalsvatnet eit fantastisk turmål òg. Takk til nemnda som har plukka ut desse postane. (Men hugs at sjølve tunet i Nedre Fossedal er privat).

Ruta til Fossedalsvatnet er vel kjend for dei fleste. Den går frå brufestet på Otterstein til Fossevikja og opp Kleivane og vidare forbi Elraki til Nedre Fossedal. Deretter opp bakken aust om Fossedalsfossen. Sjå kart. 

Her ved vassenden er det flott utsikt nordover vatnet til Øvre Fossedal. Eitrenipa, Nordre og Søndre Kringla tronar i nordaust. Her er rikeleg med toppar å nå for den som vil det. Elles er det flott å bade frå dei fine svaberga ved utløpet av vatnet. Fisk er det i vatnet òg. Ja, dette er absolutt ein tur for liten og stor

Eg har laga mange biletfilmar frå Fossedalen og området ikring. Vi har elles ei eiga Facebook-side frå Fossedalen her det er samla mykje stoff. 

Eg plukka ut nokre få bildefilmar frå Fossedalen og Fossedalsvatnet på linkane under.

Minne frå Fossedalen (fleire personar har gått ut av tida 💖)

Fossedalen Fossevika

Fossedalen 2020

Fossedalen 2019


tirsdag 31. januar 2023

Ein smakebit

Ein liten smakebit av ein topp på årets utgåve av TiTur Dalsfjorden kan vel ikkje skade.... (Det er jo alltid lekkasjar i Statsbudsjettet òg... )😉 Det går iallefall sterke rykte om at Yndestadhøgeheia (eller Yndestadheia) i Askvoll/Stongfjorden er ein av postane i år. 

Toppen har egentleg to toppar. Det er den lettaste/kortaste på 552 moh som vil vere post. Som vi ser av kartet ligg desse toppane på fjellmassivet rett på nordsida av Stongfjorden. Utan å ta for mykje i kan eg vel seie at dette er "mi heimebane". 

For dei som har vore med på TiTur Dalsfjorden og gått på Skylefjellet før. Så er starten på denne turen på same staden på Yndestad. Her det står skilt ved vegen. Du går så halve ruta mot Skylefjellet. Og tek av beint austover ved hytta ved Svartevatnet. Her det er skilta til Toreheia. I enden av dalen oppover, der det blir stigning, kan ein anten halde fram beint opp, eller gå stien til hytta ved Krikavatnet og ta ruta opp til høgre, Det er/blir merka begge deler, Og umogeleg å gå feil. (Hvis ikkje du vil gå på Toreheia først og ta returen om posten...😉). Over tregrensa her er terrenget veldig oversiktleg...

Det vil heilt sikkert kome nærare informasjon om årets TiTur. Men som eit insentiv sette eg i hop nokre bilder frå Yndestadhøgeheia ovanfor. (Årstidene kjem litt hulter til bulter...) Elles skal det jo bli  spanande å sjå kva andre postar som dukkar opp etterkvart...😄

Kart

 

lørdag 28. januar 2023

Såg i sola


Jau, såg eg i sola i dag òg. På den vanlege turen frå Holevika til Høgeheia. Det var ikkje akkurat ventande. Med regn i lufta og dårlege meldingar. Men brått vart det nokre glimt. Vi får ta det vesle vi får. Fint både på torsdag og glimvis i dag òg- Ikkje så verst det...

torsdag 26. januar 2023

Mitt kjære Toreheia

Stongfjorden frå Yndestadhøgeheia i dag

ds

Ut Stongfjorden frå Yndestadhøgeheia
Yndestad nede t.v Størdal på hi sida av fjorden. 

I dag måtte eg berre nytte det fine vèret til å gå på Toreheia. Mitt kjære Toreheia. Long time no see. Flott og vindstille vèr på morgonen, Fleire plussgrader. Og fullstendig snøfritt heile ruta. Rett nok var det frose på eit tynt islag oppe i høgda. Steinane var glatte mange plassar. 

Ruta opp gjekk eg via Rinda og Krikavatna og opp dalen. Retur vestover toppen av fjellryggen på Yndestadhøgeheia. Som ligg på nordsida av Stongfjorden, Og ned att Selda (for lokalkjende) til Yndestad. Perfekt tur! Bilda fortel vel sitt utan nokon nærare kommentar.  

 Foto Toreheia Yndestadhøgeheia Selda

onsdag 25. januar 2023

Februar i bilder

 

Februar står snart for tur. Så her tek vi ein liten rundtur med bilder frå denne månaden òg. 

Om veret i dag er skiftande ser morgondagen ut til å bli flott. 

Skodde og lett regn i lufta i dag

Litt rotete sjø ved Grimelia i dag etter forrige lågtrykk


søndag 22. januar 2023

På vedaskogen 2

Frå venstre - Håvard, Peter, Olaug, Øyvind, Marie med Villemo

Marie med Villemo

Kjekk dag i Gjerdedalen i går der vi brende ris etter at Håvard hadde felt endå fleire bjørketre til ved. Vi var ei heil samling ved Gapahuken. God og sosial stemning.