Dei siste er komne heim

John og Torill var på Kvamsnipa i dag og vart med på sanking...
Her i Mandelia etter endt dyst.

Flott utsikt aust om Kvamsnipa

.. og ned til Skorvemarka

I dag stod det ettersanking på programmet. I traktene rundt Indrevågefjellet. Dette etter eit spørsmål frå Gunnar i Mandelia. Så eg starta frå Osland rundt kl 09.30 etter å ha venta ut dei verste regnbygene på morgonen.Turen gjekk over Vågeskaret og oppe dei bratte bakkane over Osland. Etter dei siste opplysningane frå radiomerkinga skulle sauene gå nordvest for Indrevågefjellet. 

Grått og vått i Vågane i dag

Vel, den gang ei. Eller rettare sagt - dei var der, men eg fann dei ikkje. Fram og tilbake, kryssing nord og sør, vest og aust før eg stakk oppom toppen for å få utsikt der i frå. Ingen sauer. Så litt aust igjen og vest, rett over dei bratte fjellkantane over Vågane. Men ingen sau var å sjå. Deretter opp igjen og mot sør. Der eg egentleg kom opp i første omgang. Og av alle ting så dukka sauene opp i eit søkk i terrenget - alle 9. Omlag der eg trudde dei var då eg kom opp. 3,5 timar med leiting. I eit ganske vanskeleg terreng - for å seie det mildt. 

...og der dukka dei opp! Fantastisk!
Deler av Portafjellet i bakgrunnen.

Eg måtte ta ein liten tenkepause på forma. Det var langt aust til Mandelia. Via Middagsnipa og Kvamsnipa. Men eg bestemte meg for å gjere eit forsøk. 

Sauene tok no meir sør enn eg hadde trudd. Og hamna sør på Norddalsbrunene, nord over fjellkanten til Norddalen. Men eg følgde berre på. Og sauene var heilt rolege. Tydlegvis visste dei vegen. For dei gjekk så austover sør om Middagsnipa og opp over fjellet vest av Kvamsnipa. I bunn og grunn var det berre å følgje etter. Og ikkje misse dei.   

Kjende fjell i bakgrunnen

Eit stykke vest om Kvamsnipa fekk eg så telefon frå John Lien. Han og Torill var på Kvamsnipa. Han var sett frå Gunnar i Mandelia, ringt og informert om at eg kom med sauene og kanskje trong hjelp. Så dei vart med vidare austover med sauene. Sauene gjekk heilt til endes til stølen i enden av Norddalen. Og stort sett gjekk det heilt greitt siste stykket ned i Mandelia. 

Det vart nok ein litt lenger tur enn eg hadde tenkt meg dette i dag. Og nokre timar lenger òg. Men du verda kor kjekke slike fjellturar er når ein kan vere til nytte. 

Foto Ettersanking Indrevågefjellet, Middagsnipa, Kvamsnipa 301021