torsdag 29. september 2022

Nydeleg merketur

Dagens selfie (på 10 sekund) på Eitrenipa


Mot vest - Fossedalshengenipa mot høgre

Leknesvatna i bakgrunnen


Nydeleg merketur til Eitrenipa frå Skorvemarka i dag. Start ved Markavatnet klokka 09. Kjempegreie at eg fekk avtalt med Agnar om å bli med. Utan han måtte eg nok brukt minst to turar på same jobben. 

Reint fantastisk å vandre inn nordsida av Leknesvatna til vadet inne mot Leknesstølane. Blikkstilt. Nydeleg morgonsol over fjellet der i aust. Så karakteristisk i si form. Godt synleg frå Florø og Dale. Kanskje mitt favorittfjell i kommunen. Det har utruleg flott utsikt i alle himmelretningar. Inn til Blegja, sør til Dale, Kringla og Heileberget, vest til heile Nipebu-traktene og nord til Florø. I nordvest nydelege fjell mot Ålfoten og Nordfjord. 

Jobben og turen fekk vi unnagjort på omlag 6 timar. Fjellet er post på den nye fjelltrimmen til AHIL (Askvoll og Holmedal Idrettslag). For oss pensjonistar er vel dette å rekna som ein bra lang tur. Møyra i kroppen var vi begge då vi kom ned igjen. Stor takk Agnar!  

Mobilfoto Eitrenipa 290922

tirsdag 27. september 2022

På føtene - igjen...

Stongfjorden i motlys i dag




Etter 14 dagar med korona, slapp og fæl, var det jammen godt å få seg ein luftetur igjen. Ahh - det gjorde godt!  

Meir haustleg no enn sist eg var på fjellet her heime. Og litt vått. No står merking til ny fjelltrimsesong for døra, så her må forma skjerpast. (Det er tungt når den daglege trimmen stoppar opp). Eg har teke på meg å få boksen og boka opp på Eitrenipa. Neste sesong 30-poengs tur.  Under samleserie Eitrenipa!

lørdag 17. september 2022

Ei veke sol - og så...

Sun Beach Resort Ialyssos, Rhodos
Fine dagar her på voksen-avdelinga Infinity

Ponormitis Monastery 

Diverre vart ei flott veke på Rhodos avløyst av min porsjon korona. Når alle andre var ferdige var det visst min tur. Så denne veka har gått med til å flytte meg rundt frå seng til sofa og tilbake. Kjedeleg. Men sjølvsagt berre å ta tida til hjelp. Kikka tilbake på litt bilder frå forrige veke...  Då sola skein frå skyfri himmel. 

mandag 12. september 2022

Seinsommarveke på Rhodos

Med Tone og Sillan på Rhodos

Midt opp i all tragedie her på Yndestad, valde Olaug og eg likevel å ta turen til Rhodos førre veke i lag med Sillan og Tone. Turen var bestilt for ei stund sidan. Det var første gongen deira her. Vi tok òg båtturen til Symi og Panormitis. Kjekt å kunne reise i lag i desse vanskelege tider.    

Mobilfoto Rhodos 040922-110922 

onsdag 31. august 2022

Kjekk tur til Bergen


 Fin tur heim igjen frå Bergen og Haukeland i går! 

søndag 28. august 2022

Mamma 85 år

Ved Storesteinen på Sørebø
oss søsken og mamma.
f.v. Mildrid, Leif-Arne, Sigvard, Øystein Olav, meg og Bergljot - og mamma


Vi hadde ei veldig kjekk feiring av mamma sin 85-års dag på Yndestad Gard i Guddal i går. Det er mandag som er dagen hennar! På Bakken på Sørebø fekk vi først besøke bestefarstaua der mamma og pappa budde ein vinter i lag med Sillan 0,5 år og meg 1,5 år i 58/59. Mektig og koseleg! Tusen takk til Odd Arne Osland for at vi fekk kome!

Bakken på Sørebø 

ds

Eg trur vi var 54 stykke av familien samla. Smått og stort. Bilda frå tilstellinga er av privat art. Så dei held eg førebels innan familien. 

Tusen takk til Yndestad Gard for flott service og god mat. Kan absolutt anbefale ein tur hit. 

Og kaker og anna kom og på bordet...


torsdag 25. august 2022

Fjelltrimtoppar 2023...?

Frå bildeserie Under open himmel på Eitrenipa

I det dårlege vèret har eg teke ein smugkik på det som etter programmet er nye fjelltrimpostar for 2023. Oppstart i byrjinga av oktober. Her dukkar det opp mange kjende og kjære fjell. Spesielt vil eg seie at Eitrenipa er ein av favorittane mine. Som sagt fleire gonger før. Fjellet høyrer til Kvammen sida av kommunen. Men også fint tilgjengeleg gjennom Fossedalen og Eitreskaret (sjå foto frå Fossedalshengenipa). Frå Skorvemarka i Kvammen går ruta som kjent via dei idylliske Leknesvatna. 

Eitrenipa t.v.frå Fossedalshengenipa

I Rivedal står Stølsfjellet på programmet. Ein relativt enkel tur via Lisetstølen/Nedgardstølen. I nordvest-enden på Vagstaddalen. Som Eitrenipa noko bratt i oppstigninga mot toppen. Vinterstid kan dette vere utfordrande. Men då kan ein med fordel gå opp dalen på nordsida og vest til toppen. 

Høgeheia høyrer til Stongfjorden-sida av kommunen. Fjellet treng vel ikkje nok nærare beskriving. Det ligg som høgste punktet ute ved Staveneset. Godt merka og god sti allereie. Her er det forresten 4 fester for hengekøyer om nokon vil overnatte i solnedgangen. 

Og så kjem vi til Dokka. Kjært fjell i Holmedal. Av mange karakterisert som de vakraste i kommunen. Iallefall med ei fantastisk utsikt til Dalsfjorden og bygdelaga ikring. Greie og merka ruter opp ranen i aust eller via Nyksvatnet/Nykshytta i nordaust. Under bildeserie her i frå òg.

Til sist av dei obligatoriske og sannsynlege postane på fjelltrimmen neste år, er Hjartåsen i Askvoll. God sti inn ved Presteelva og på vestsida av Askdalen. Ein ganske enkel og grei heilårs-tur. 

Blegja er som vanleg fast post, men ikkje obligatorisk å gå på. Under ein bildeserie her i frå òg. 

Som vi ser er det mange kjekke toppar å gå på frå hausten av. Noko for ein kvar smak - og ei kvar årstid. Hugs tryggleiken og God tur!

tirsdag 23. august 2022

Fin fjelltrim

Dagens selfie

Mot Livra, Flekkefjorden, Leitet og Tysse

Mot Nipebu-traktene

...og Fossedalstraktene med fjella ikring

Herleg tur inn Heileberget til fjelltrimposten på Driveknolten i dag. Den vanlege og merka ruta frå Rivedal. Tur/retur. Overskya, god temperatur og vindstille. Perfekt turvèr med andre ord. Dessutan ganske tørt etter kvart. Sola som var lovd såg eg ingenting til før eg kom heim igjen.  

Foto Drivekolten 230822 

mandag 22. august 2022

Alt slags vèr

Tunge skyer over Dokka og Dale

... og Askvoll

Alt slags vèr om dagen. Sturtebyger og sol om eit anna. Av og på med klede. Ja, ei rein utfordring å ta med seg høvelege klede på tur. Så lett kledd som mogeleg er jo alltid ein fordel...! I skovegen er det dessutan kjekkast å vere lett skodd.
 
Ovanfor eit par bilder frå Fristadfjellet i dag. Som kjent ein av fjelltrimpostane. Dei blir skifta ut med nye første helga i oktober (reknar eg med). Så då skal det bli kjekt med litt nye toppar...