Blindeføre

  

Flott tur på Toreheia og Skylefjellet i dag. Det låg ein heil del snø ovanfor Rinda. Og oppe forbi Krikavatna mot toppen var det is inn under 2 cm nysnø. I dag brukte eg trugar. Det var heilt fint. Dei er gode jarn under når det er skare og isforhold. 

Men heime er det grønt...

Elles var det veldig blindeføre inn att i mellom. Og vanskeleg å sjå konturane i terrenget. Slik sett heilt ok utan ski...

Foto

Toreheia_Skylefjellet 050316

Utsikt frå Stordalsfjellet

Frå Mountains in Askvoll i dag

1.mars og første vårmånaden i dag, og vi er tilbake på Stordalsfjellet i Kvammen med den flotte utsikta til fjella i aust.

Vi ser den ovale og bratte framsida på Eitrenipa t.v. med skara opp frå Leknesvatna i nord og Eitreskaret/Botnatjerna i sør. Dei møtest i det kvite partiet midt på fjellet under toppen. Det er rimeleg bratt her og kan vere frose på (hugs broddar)!

Bak Eitrenipa ser vi den kjende konturen av Blegja. Oppstigninga frå vest er opp dalen mot venstre over den spisse toppkanten. Her kan de òg vere frose på til langt ut på våren. Når det brånar snø, er det fint å gå ned ryggen mot høgre og ta skåra/ura vidare ned på sørsida. Her i frå kan du gå vidare mot Gaularsida (Kvanndalen) i sør, eller halde fram over Synste Stauren (kvite spissen) og over Blåegga til Eitrenipa i vest.

Midt i bildet heilt bak ser vi første Heilevangstauren og Storehesten. Løypa frå Berge i Bygstad til Blegja kjem opp over den snøfylte kanten t.h.(Marifjellet) og held fram mot vest over staurane. 

Mot høgre i midten ligg Nordre og Søndre Kringla, og heilt i kanten Laukelandshesten. Løypa frå Eitrenipa til Kringlene går over det flate partiet i midten. Når du kjem frå Fossedalen går ein opp skaret mellom fjella. Her kan du returnere om du kjem frå Eitrenipa, og gå nordatt langs Krokavatnet til Førdefjordsida, eller til Dalsfjorden i sør.

Fossedalshengenipa ligg framfor Nordre Kringla med si kjende oppstigning opp ryggen frå nordaust. Anten du kjem frå Fossedalstraktene eller Skjerlia.

Fremst i bildet ligg så deler av den flate Markahengenipa i venstre kant. T.h for den, ryggen på Høgknolten der DNT-ruta frå Førdefjordsida til Nipebu kjem opp. Vi ser austkanten av Langevatnet nede i høgre bildekant, men sjølve hytta ligg ut om bildet. 

Frå gamalt av høyrde ein heil del av dette området til Fjaler, men vart omregulert til Askvoll 1. januar 1990. For mange askvollingar er truleg nokre av fjella relativt ukjende.

Som nemnt er bildet teke frå Stordalsfjellet. Fjellet har lett tilgjenge gjennom Stordalen frå Skjerlia. Frå Osland over Indrevågefjellet, sør om Middagsnipa og over Norddalen eller frå Oslandsbotnen gjennom Porten og opp skaret sør om Portafjellet.

Kveldsstemning heime

Var ein tur ned på kaia og tok meg nokre kast med fisketroa.

Ein liten torsk vog eg på ei handa, men gavmild som eg er fekk han livets rett...

Det var fint der nede i kveld....

White out og latter

Sola går i hav frå altanen i går

Yndestad i går

Ved Svartevatnet i dag

Ved Svartevatnet minuttar før White Out...

To turar på to dagar til Krikavatnet, og begge dagar fullstendig white out. I dag kom skodda som skota ut av ei kanon. Vanvittig fort inn frå havet. Så å gå på Toreheia såg eg inga hensikt i. 

I tillegg var det grådig tungt i all snøen. Sjølv med trugar. Som i seg sjølv er tungt i lengda. Så jammen fekk eg køyrt meg skikkeleg. Mulig eg har tapt meg? Vel ikkje verre enn at eg tok meg ein joggetur på Staveneset i går ettermiddag, etter nok ein nedtur for fotballaget mitt i England. Ja, ja betre lukke neste gong, Både på den eine òg den andre måten. Life goes on! Always look at the bright side of life....

No fekk eg med meg eit veldig kjekt "kalkun-lag" på Mjåset i går kveld då. Sjølv om eg er avhaldsmann kjennest det nesten ut som ein rangel i dag. Iallefall i halsen - etter all låtten...! Så det var nok toppturen denne helga. 

Krikavatnet 27 & 280216

Mountains in Askvoll

Frå Blåfjellet i Askvoll

Følg Mountains in Askvoll på Facebook der eg dagleg legg ut tips til turar og litt bilder.

Kvitt i kvitt

Ved Svartevatnet i dag...

Hytta ved Krikavatna

Eit innpakka vesen av kjøt og blod...

Godt å ha litt merke der oppe

Det var temmeleg heftige saker oppe på fjellet i dag. Null sikt, hagl, regn og snø. Ja, og so vind. Har eg fått med alt då...? Så eg fann det greiast å returnere frå Krikavatna og heim att til fyr i omnen.... Det var ikkje verandes for levande vesen der oppe i dag. Men "the tide is turning" som det heiter på fint. Alltid. Så det blir nok solskinnsdagar endå får vi tru....

Alt slags vèr

Sola stakk gjennom i Holevika

Klårt på kysten - ei heldig stund

I dag tok eg meg rett og slett ein joggetur ca mila til Holevika igjen. Det rufsete vèret inviterte ikkje meg til noko anna iallefall. Så fekk eg no trimma og lufta meg litt i dag òg. Heilt ok!

Synste Stauren Blåegga 2015

I serien Mountains in Askvoll som eg legg ut bilder på sette eg i hop stillfilmen ovanfor i dag.

Fann i tillegg ein liten videosnutt frå 2009 

Flott runde 2

Skylefjellet

Vågane og Flokeneset

Utisikt ned mot Stavestranda

I dag gjekk eg den flott runda frå Vågane og opp på Ytrevågefjellet, vidare vest på Toreheia og Skylefjellet med retur over Mangevatna og heim til Yndestad. Dette er ein kjempefin tur på 3-4 timar. Alt etter som. Det som er spesielt fint er at det er sol heile året på nesten heile ruta. Kun den første vesle biten opp frå minene i Vågane ner det ikkje sol vinterstid. 

Første morgonsola i Vågane

Var det fint vèr i går, så var det endå finare i dag. Sol frå absolutt klår himmel. Men på Toreheia var det ein litt sur nordatrekk, så der var eg glad eg fekk skifta noko sveittevått ty på overkroppen. 

Oppstigninga frå Ytrevågefjellet til Toreheia

Elles er det som vanleg mykje mindre snø på denne sida av Stongfjorden enn den andre. Havlufta og sola får betre tak på denne sida. Og mange plassar var det heilt bart og snaublese. Spesielt nede rundt Skylefjellstraktene. Isen på Mangevatna var forresten heilt trygg. 

Lite snø ved Skylefjellet

Knallflott tur i dag òg. Bra utteljing kan eg vel seie eg har hatt denne helga! 

Foto

Vågane_Ytrevågefjellet_Toreheia_Skylefjellet 140216

Flott runde

Selfie Hekkelfjellet

Eg låg ei stund i senga i dag tidleg og lurte på kvar eg skulle ta turen. Sidan eg frå soverommet konstaterte at stjernene funkla på himmelen ville eg gå ein litt lenger fjelltur enn vanleg no på vinteren. Det gjekk brått opp for meg at å gå frå Oslandsbotnen, opp i Svelia og skaret i sør til Smørskornova, var lenge sidan sist. Så kunne eg etterpå ta med nokre toppar vestover. 

I dag gjekk eg tilbake til eit tynt ullpar, brødposar ut igjen på og eit tjukt ullpar på føtene. Det har funka flott før. Og i lag med dei nye sålane verka det bra i dag òg. Var stort sett heit og god på føtene. Sjølv om eg har ei tå eller to som er litt defekt i vevet etter forfrysningar. Dei blir alltid kalde. 

Temperaturen viste minus 6 i Oslandsbotnen klokka 8.30. Fint og friskt med eit lite austadrag i lufta. Som alltid der oppe når det er fint vèr. Første snøen låg steinhard eit stykke opp i Brekka. Og snø vart det stort sett resten av turen. Alt frå is, skare og til noko laussnø opp igjen på. Og opp det bratte skaret i Svelia til Smørskornova (frå nord) gjekk det ganske så tungt øvst oppe då her låg ein del fòksnø. Men etter å ha pusta skikkeleg i bakken eit par gonger, kom eg meg opp på platået. Eg gjekk forøvrig inn heile det islagde Sveli-vatnet til botnen i vest då dette var både lettare og kortare enn å gå på land. 

Smørskornova

For dei som er litt kjende så veit dei at ein kryssar ruta frå Stongfjorden til Nipebu på nordsida av Smørskornova. Ruta går vest/aust medan eg no gjekk nord/sør. Det er flott utsikt ned til Dalsfjorden og Rivedal frå Smørskornova. Og sjølvsagt vestover fjella og til Førdefjorden i nord. Det er òg utsikt til alle dei kjende fjella i aust. 

Det neste eg bestemte meg for no var å gå over det islagde Langevatnet og beint opp på Hekkelfjellet frå søraust sida. På vinterstid er det alltid ein fordel med dei islagde vatna i fjella. Så også no. Men det var rimeleg tungt å kome seg opp på dette fjellet òg. Det er veldig flott utsikt frå Hekkelfjellet. Spesielt til Dokka og Moldura. 

No var spørsmålet om eg skulle gå nord til Skålefjellet og Svarthamrane, eller gå over Siklabergvatna til Fanafjellet og vidare på Moldura. For dei to sistnemnde fjella hadde eg bestemt meg for allereie. Men eg fann ut at å gape over for mykje kanskje ikkje var så lurt. Eg måtte ha såpass kontroll på kreftene at eg kom meg heim att òg. Så då gjekk turen ned frå Hekkelfjellet på nordsida og deretter vestover til Siklabergvatna. 

Hekkelfjellet: Dokka og Moldura

I dag var det faktisk litt problem med å kome seg ned den vanleg vegen frå Hekkelfjellet, sidan det låg ganske mykje bratt snø. Men over på austsida gjekk det greitt å kome seg ned. 

Her i frå og vestover kjem ein inn på DNT-ruta frå Stongfjorden til Nipebu. Ikkje det at det gjekk an å sjå noko særleg med merke i dag pga snøen. Men retningen seier seg sjølv. På denne tid ligg dette området unnasols sidan Hekkelfjellet sperrar frå den låge sola i sør. Men på motsett side av vatna fekk eg sola att. Herleg. Og no hadde eg den resten av turen. Ja, i enkelte parti var det reine påskestemning. Merkeleg det der med sola. Du får ein psyisk boost av den. Så turen vest til Fanafjellet gjekk som ein leik. Sjølv om eg allereie hadde gått i fleire timar. 

Eg var litt spent på den bratte traversen på nordsida av Moldura. Denne må du forbi for å kome deg opp frå nord. Vel var den bratt, men med nye broddar gjekk det heilt piano. Her var heller ikkje så isande hard snø. 

Siklabergvatna: Moldura

Moldura: Holmedal og Straumsnes

No kjende eg det bra i føtene etter å ha kome opp på Moldura òg. Men fram på kanten i sør og i vest måtte eg for å ta nokre bilder. Deretter fann eg meg noko saft og nokre mandlar og rosiner. Det var ikkje mange minuttane etterpå før eg følte meg ganske pigg igjen. Så eg sprang ein del av vegen nedover før eg bestemte meg for å gå heilt vest på Størdalsstauren òg. Som sagt så gjort. 

Her ute på pynten var det snøfritt. Så eg la meg i det tørka graset med den fantastiske utsikta til havs. Ja, det var blikk stilt rundt øyane utanfor Florø. Øyriket spegla seg i sola på det blankstille havet. Utruleg. Midt i februar. Snakk om å vere heldig med å ha fri i slik eit flott vintervèr. Så her var det berre å takke høgare makter. 

Størdalsstauren

Turen til fjorden og Neset gjekk det vanleg ruta. Heilt greitt. Men det tyngste i dag var likevel å måtte gå frå Neset til Stongfjorden og heim til Yndestad etter asfalten. Etter 6 timar i fjellet var det ein prøvelse for føtene. Så her sit eg og er godt nøgd med dagen. Perfekt egentleg!

Heime er snøklokkene på gang....

Foto

Osland_Svelia_Smørskornova_Hekkelfjellet_Fanafjellet_Moldura_Størdalstauren 

130216

Video Størdalsstauren 130216