lørdag 15. oktober 2016

7 timar 9 fjell

I dag tidleg:
Portafjellet midt i bildet og Skålefjellet-
to av fjella eg var oppom i dag

Smørskornova Bakkefjellet Dokka
Alden og Moldura
Svelivatnet


Rivedalskletten



Utløpet av Langevatnet i Holmedal inkl heimelaga saft...
Dagens selfie på Hekkelfjellet



Svarthamrane i dag

...og Skålefjellet

Osland


7 timar solid fjelltrim i dag med toppane Portafjellet, Stordalsfjellet, Vardeheia, Røyrbotnholten, Smørskornova, Hekkelfjellet, Svarthamrane, Skålefjellet og Nipane. Ruta starta og slutta i Oslandsbotnen. 

Det var noko meir vind på toppane i dag enn i det siste. Men temperaturen var utrulege 13 grader då eg reiste heime i frå noko etter klokka 07. Kanskje unødvendig å nemne at det var sol.... Eller rettare sagt - det vart sol, for det var tussmørke då eg drog...Unnateke ein matbit ved utløpet av Langevatnet mellom Smørskornova og Hekkelfjellet (fast plass) gjekk turen i eitt. 


Flotte haustfargar på oppstigninga til Svarthamrane frå aust.
Portafjellet i midten og Vardeheia t.h. har eg vore oppom...

Fargane er eit kapittel for seg sjølv om dagen. I alle variantar av brunt. Brunt og blått er fint i lag. Knallblå himmel og haustfargar er det flottaste naturen kan by på. Det er flott når det grønkast om våren, men fargeprakten må ein til hausten for å finne. Kvar årstid har sin sjarm. Vi er heldige som bur i eit så flott og fritt land som kan nyte desse. 


Frå oppstigninga til Vardeheia (Vardenova) frå aust er det flott utsikt austover Stordalen.
(Fjella i aust kjenner vel dei fleste som føl bloggen).

I dag lèt eg bileta tale for seg sjølv. Detaljane får kvile. Det treng min snart 60 år gamle skrott òg...:-)
Foto
151016

fredag 14. oktober 2016

"All I Have to Do Is Dream"

Kanskje var dette beste bildet frå Staveneset hin kvelden...

All I have to do is dream


torsdag 13. oktober 2016

Oktobergrill i solnedgang







  




"Lova herren han er nær" - ja, ein kan bli reint religiøs av dei flotte oktoberdagane vi har. Medan ein elles rundt om på jordkloden slit med vanvittige krigar og uhyrlege stormar som ranar livet av folk, hus og heim, sit vi på vår fredlege plett og nyt oktoberkveldar som ingen kan minnast. Livet er aldri rettferdig. Heller ikkje vèret om det skulle vere noko samanlikning. 



Iallefall hadde vi nok ein fantastisk oktoberkveld ute på kysten ved Staveneset. Blankt hav, bål, pølser og grill (med løyve frå Olav S). Strålande nøgde ungar. og ei praktfull sol som tok sine siste strålar med seg i hav. Midt i veka på ein vanleg oktoberkveld etter ein vanleg arbeidsdag. I bunn og grunn er ein berre forplikta til å nyte livet som er gitt ein i gåve. Uansett kor urettferdig verda måtte synast. Så kan ein jo berre filosofere om det er nokon som styrer akkurat dette. Nydelege kveldar på Staveneset er gitt oss akkurat for slikt.


onsdag 12. oktober 2016

Holtsnipa 1139 moh

Fekk eit fint bilde teke av ein kollega med ein Iphone 5 frå Holtsnipa på Viksdalen.
Bildet viser m.a. deler av Viksdalsvatnet og mot Hestadgrend.
Kjekt å sjå att alle dei kjende fjella i syningom frå ein annan og ukjend vinkel.


tirsdag 11. oktober 2016

Fjelltrimsesongen AHIL

Frå oppstigninga til Smørskornova frå nord 1/10-16



Eit par tips til den nye fjelltrimsesongen

Fossedalshengenipa, Smørskornova og Fanafjellet er fine å ta i lag (3 bøker "på ein gong") Det er eit stykke frå Fossedalshengenipa til Smørskornova via Nipebu, men på vinteren er faktisk dette den flottaste skituren som er i fjella i Askvoll. Frå Smørskornova til Fanafjellet via Siklabergvatnet og Mannskaret, er det ikkje så lange stykket.

Eit anna tips er å ta Fossedalshengenipa først, for for så å gå på Smørskornova frå Oslandsbotnen og Svelia etterpå. Då sparer du mykje køyring frå Skorva til Holmedal eller Rivedal når du først er "nordaførr". Det er nemleg fint å gå på Smørskornova via dei to skara i enden på Svelivatnet. Via skaret lengst aust kjem du opp rett vest for Røyrbotnholten og føl "den vanlege ruta" opp. Og via det største skaret kjem du opp rett på nordsida på Smørskornova. Ver likevel obs på at om vinteren er det unnasols her, og det kan vere skare/is opp stigningane.

Fanafjellet er dessutan heilt supert å gå på frå Neset i Stongfjorden. Opp ruta frå Ansgar Bjarne. Godt merka til Moldura der du berre tek av øvst oppe ved Langedalen. Då slepp du endå meir køyring. Aberet med fjelltrimmen i seg sjølv er jo all køyringa, så det er greitt å kunne planlegge litt.

Framsidebildet som ligg ute no er teke rett vest for Smørskornova ved Langevatnet 1.oktober i år. #mountainsinaskvoll

søndag 9. oktober 2016

Om fjelltrimbøker og payback-time

Dagens selfie

Eitt av motiva mine frå ruta om Krikavatna til Toreheia


Fjelltrimgruppa i Askvoll har no fått lagt ut ny bok på Toreheia. Kjell og Tordis la denne ut i går kveld. Eg gav difor beskjed om at den andre boka som ligg fast der oppe vart teken ned slik at det ikkje skulle oppstå "forviklingar". Den gamle boka ligg difor i kjellaren min heime. Ho blir lagt ut igjen når trimgruppa i Askvoll er "ferdig" med fjellet neste haust. Det er unødvendig at det ligg to bøker der oppe. 

Ved Mangevatna
Det er mange som synest det er kjekt å skrive namnet sitt i ei bok på fjelltoppane i kommunen. Etter mitt syn er det fint at det ligg bøker på så mange fjell som mogeleg. Og ikkje nødvendigvis dei fjella det er konkurranse om å oppnå flest mogeleg poeng på. På fjella i Kystarven ligg det faste bøker m.a. på Skylefjellet og Fløyen. Og fleire på Atløyna. Det ligg dessutan faste bøker på Yndestadhøgeheia, Kringla, Skålefjellet, Dokka og Brendeheiknappen. Turlaget i Kvammen har òg postar med bøker. Eg har eit ynskje om at det blir lagt ut bok på Moldura. Dette vil eg ta meg av med det første. Hugs å pakke bøkene godt inn når du har besøkt fjella. 

Svanøy og Florøkanten
Eg var oppom Toreheia og Skylefjellet ein tur igjen i dag. Etter den relativt lange turen i går, fekk det greie seg med halvparten i dag. Når det gjeld vèret, fargane, stilla og alt, så slepp ein vel etterkvart opp for superlativ. Som den ekte sunnfjordingen eg er så lurer eg berre på korleis vi skal få betale dette tilbake...
Sjå foto


lørdag 8. oktober 2016

Hjort på flukt

Morgonsol over Askvoll

Gullforgylt utsyn

Dagens selfie Dokka
Skadeskota lirype som ikkje kunne flyge


Utsyn mot Straumsnes

Frå Svarthamrane med ustyn til Dokka, Kalderasnipene og Moldura.
Fjella eg nyst har vore på....
Stongfjorden


Nestigninga frå Skålefjellet
Dokka og Moldura i bakgrunnen mot høgre


Det tok nesten sine 6 timar å gå frå Eidsfjorden via Kalderasnipene til Dokka og vidare derifrå om Nyksvatnet til Moldura og Fanafjellet, for så å avslutte turen med Svarthamrane til Skålefjellet og via Gjerdedalen til Stongfjorden. Eg la inn ein matpause med denne utsikta:

Vardenova Heileberget Hekkelfjellet og Siklabergvatna
Eg hadde eit håp om å få sett sauer her oppe på denne strekka (eg gjekk jo mykje av denne forrige helg òg frå lenger aust), men her var ikkje ein kvit dott å sjå. I staden fekk eg oppleve hjort både på Moldura og sør om Skålefjellet. På høgste fjellet! 3 + 4 (sjå videoar). Og det var litt spesielt. Truleg er det godvèret som har gitt dei tankar om det gode fjellivet... 

Elles må ein jo berre få prise det fantastiske haustvèret vi har. Eller som Jakob Sande skriv "takk for det fine vèret høgt opp i himmelen"... Morgon på Kobbeskjeret handlar om frie menn. Om eg ikkje nett sat på eit skjer og hylla dagen i dag, så kan eg vel seie at eg som fri fant hylla det gullforgylte landskapet eg fekk vandre i. Fantastisk! Meir er det vel ikkje å seie....



fredag 7. oktober 2016

Frå Mountains in Askvoll


Frå Mountains in Askvoll

Sidan vi var innom Blegja i går, tek vi med ein liten oppfølgar i dag.Vedlagt to bilder frå to ulike årstider.

På folkemunne lever det fleire vandrehistoriar om det "smale" punktet ute mot toppen av Blegja. På snøfritt underlag kan det tykkjast rart at dette punktet er så smalt. Som vedlagde haustbilde viser er det egentleg ganske breitt. På snøføre om vinteren kan det likevel vere litt annleis. Difor er det sett opp markeringsstolpar som viser kvar det er fast fjell (av og til er stolpane nedsnødde).

Om vinteren heng det store skavlar ut over nordsida av Heilefjellet mot Førdefjorden. Som vist på bilde to, teke mot det "smale" punktet. Og her er det bratt utfor! Mot Kvanndalssida på sørsida er det òg bratt dei fleste stadar. Om ikkje stupbratt, Hellinga på snøen om vinteren gjer likevel til at det "smale" punktet virkar smalare enn det i røynda er. At enkelte synest dette er eit ekkelt punkt er difor forståeleg. Skarete og isete og bratt utfor på begge kantar som det er. Og i tillegg har ein usikkerheita over kor stor skavlen er mot Førdefjorden i bakhovudet
Når ein snakkar om vandrehistoriar så har dei alltid ein viss porsjon sannheit i seg. Kor mykje kan jo diskuterast. Men det er fortalt at ein som gjekk på ski over dette punktet ein vårdag, stakk skistaven gjennom skavlen og såg ned i Førdefjorden. Ein annan har fortalt at skisporet han laga på veg ut på toppen var vekke då han rende inn igjen! Dette må no ha vore før stålstolpane på bildet vart sette opp. Om ein kan lite på desse historiene veit eg ikkje. Kanskje du veit meir...
God turhelg frå Mountains in Askvoll #mountainsinaskvoll

søndag 2. oktober 2016

Nordsida




I dag gjekk eg den flotte turen frå Vågane via Ytrevågefjellet og Toreheia til Yndestad. Krossa litt fram og tilbake nord/sør oppe på platået for å sjå om det gjekk sauer her opp. Ingenting å rapportere. Truleg går det nokre nede i Oslands-lia. Men der er det så mykje lauv på trea endå at det er umogleg å få oversikt. I høgda går det iallefall ingen. 

Derimot var det svermar med trast på trekk over området. Sidan det er EuroBirdwatch weekend får eg rapportere dette inn på Artsobservasjoner. 

Elles var det eit fantastisk vèr. Men kaldt i høgda på morgonen. Vasspyttane var difor frosne til is. Flott og fargerik start på dagen.

lørdag 1. oktober 2016

Roundabout Holmedalsfjella

Osland i dag tidleg

Oppstigninga til Smørskornova frå nord

Utsikt mot vest frå Smørskornova
Frå nedstigninga mot Langevatnet







Flott roundabout i Holmedalsfjella i dag på jakt etter sauer. Eg starta såleis frå Oslandsbotnen ca 08.15, og gjekk først opp i Svelia. Ved enden på vatnet gjekk eg opp skaret i enden på dalen, og her frå nordsida opp på Smørskornova. Vèret var nokolunde bra, men ein del skodde. Seinare vart det alt slags vèr.... 

Eg gjekk deretter ned Smørskornova på sørsida og til Langevatnet. Her i frå nord att til enden av vatnet, og tok opp på Hekkelfjellet frå austsida. Fantastisk flott no. Vatnet låg blankt. Landskapet spegla seg i vatnet. Flotte haustfargar på lendet. Ja, sola stakk til og med fram...


Langevatnet (Holmedal)

Så gjekk eg ned frå Hekkelfjellet på sørvest sida til enden av Siklabergvatnet. Deretter opp igjen DNT-stien til Mannskaret. Ikkje ein sau var å sjå. Alt eg hadde sett var tre heipiplerker som hadde utsett trekket, og ein ramn. Ikkje rare greiene gitt.



Utsikt frå Hekkelfjellet

Deretter gjekk turen vestover frå Mannskaret og opp på Fanafjellet. No dreiv det inn ei saftige regn- sludd- og haglebyge frå havet. Skodda tjukk som graut. Men eg gjekk vidare over toppen på Fagredalen og opp nordsida av Moldura. 


Moldura
Skodda kom og gjekk, men stort sett var sikta veldig dårleg. Eg nådde opp på toppen. Og her fekk eg skifta på meg ei ny tørr ulltrøye og eit vindskjørt under Rab-jakka. Det gjorde seg. For det var iskaldt. Nei, her var det berre å komme seg til fjorden igjen. Turen ut på Størdalsstauren hoppa eg over. I skodda var det ikkje noko å sjå likevel. Så delvis springande kom eg meg ned att på Neset i bygda. Utan å ha sett ein einaste sau. 


Det lysnar ute i havet igjen
Men gjet kva... Olaug og Marie hadde henta bilen min i Oslandsbotnen, og sett han klar til meg ved fjorden. Godt å ha ei kjekk frue og snill stedotter. For det var jammen godt å kome seg fort heim att i dusjen. Turen hadde teke nøyaktig 5 timar, inkludert 5 minutt stopp på Moldura. 


011016