TiTur Dalsfjorden komplett

 

Vidsyn med Velaug, Connie, Sissel og Olaug

Tingstusteinen med Velaug, Connie og Olaug

Polleneset med Velaug, Olaug, Sissel og Connie

Lisetstølen/Nigardstølen med Olaug, Connie og Velaug

Høgevarden 

Høgefjellet og Havreheia med Olaug

Furefjellet med Olaug

Fredensborg med Velaug, Olaug, Sissel og Connie

Atløynipa med Sillan, Tone og Olaug

Foto Olsetåsen vantar...

Ei kort oppsummering og nokre bilder frå TiTurDalsfjorden. 

Turane i år var vel heller av det lette slaget. Lengste postane til Atløynipa og Havreheia. Og kanskje dei to flottaste òg. Rett nok er det betre utsikt frå Høgefjellet som du først går på når du skal på Havreheia.Vidsyn, Polleneset og Fredensborg var jo fantastiske turar òg. Om ikkje så lange. Furefjellet med nydeleg utsikt til Staveneset og øyane i vest. Liset-/Nigardstølen og Tingstusteinen er òg greie turar med flott utsikt mot Rivedal og Holmedal. På Høgevarden såg eg "ingenting" på toppen. Men ser frå andre foto at her er nydeleg utsikt spesielt til Flekke, Flekkefjorden. Takkar elles for god merking denne dagen eg var her. Olsetåsen var så kort at eg gløymde å ta bilde...

Oppsummert kan eg såleis igjen seie at turane var veldig bra. Turar for alle og ein kvar. Og det er vel nettopp det som er meininga med TiTur - å få flest mogeleg ut på tur! Så her er det berre å pusse skoa og kome i gang om du ikkje allereie er det! Her er lang tid igjen av årets sesong. Heilt til 1.oktober. God tur!

P.S. Eg fullførte årets postar med Havreheia 20.mai. Og alle turane var veldig godt merka. Applaus til alle som har teke på seg det flotte dugnadsarbeidet med merking og tilrettelegging. Ei spesiell takk til John Lien, Ingeborg Tysnes og Indre Sunnfjord Turlag for organiseringa av dette flotte tiltaket.  

Mat inkludert trim

Siktanuten i dag

Eg fekk lyst til å ta turen oppom Siktanuten i dag sidan eg måtte ei handlerunde til Askvoll. Lenge sidan eg har vore på denne trimposten. Kjekt var det! Litt væte i graset etter nedbøren i natt. Så noko våt vart eg på føtene. Sjølv om temperaturen ikkje er så høg som den var tidlegare i månaden var det ikkje noko problem bli litt våt. Ned igjen fekk eg på meg 10 regndråpar. Ikkje allverda...😁Fin trimtur!

Super morgontrim

Dagens selfie...😁

Utsikt mot Fossedalen, Nordre og Søndre Kringla
Vi ser sørenden av Krokavatnet t.v. og ein bit av Fossedalsvatnet t.h.
Øvre Fossedal omlag midt i bildet

Nydeleg morgontur til herlege Fossedalshengenipa i dag tidleg. Ei stund sidan sist no. Og før regnet som er meldt kom. Tørt og fint. Sol og litt søraust trekk, men god temperatur. Så god at eg gjekk i berre shortsen heile vegen. Både opp og ned. Når forholda er slik er det berre moro å gå opp den bratte fjellryggen. Fylt av konglomerat. 

Etter litt bilder tok eg same vegen ned igjen ryggen. Ned til nordenden av Krokavatnet og til Markavatnet. Super morgontrim!

Fotoserie Fossedalshengenipa YouTube

Foto Fossedalshengenipa 270524

TiTur Dalsfjorden Havreheia

På Havreheia i dag med Sissel og Olaug

Vi hadde ein fantastisk tur på Havreheia i Dale i dag! Ruta via Dingemoen (gamle demma) til Torset, Grøneholten, Høgefjellet og aust til toppen. I eit utruleg flott ver. Utan ei sky. Og vindstille. På denne turen var vi - Olaug, Sissel og underteikna. 

Bilda fortel sitt. Havreiheia og Høgefjellet har veldig flott utsikt. Ut Dalsfjorden. Og til alle dei nydelege fjella på nordsida av fjorden. Heilt frå Dokka i vest til Storehesten i aust (sjå bildeserie og video). 

Merkinga og skiltinga av stiane i Dale må og nemnast. Veldig bra. Stor applaus! I dag var ruta tørr og fin heile vegen. 

Vi hadde oss ein kjekk matpause på toppen. Med panorama utsikt til Blegja, Storehesten og Bygstad. Heilt nydeleg. Takk for turen! 

Foto Høgefjellet og Havreheia 200524 

TiTur Dalsfjorden tur inkl fjelltrimpostar

På Smørskornova - Connie, Olaug, Velaug og underteikna

Fanafjellet - Olaug, Velaug og Connie

Vi hadde oss litt av ein ekspedisjon i Rivedal og Holmedalsfjella i går ettermiddag og kveld. Vi var Olaug, Connie, Velaug og underteikna. Ikkje mindre enn 4 postar stod på programmet. Liset/Nedgardstølen og Tingstusteinen i henholdsvis Rivedal og Holmedal som TiTur postar. Og Smørskornova og Fanafjellet som fjelltrimpostar. Ja, det vart litt av ein tur i den nydelege kvelden. 

Vi starta i Rivedal. Eller det vil seie Velaug og eg sette først ein bil ved vassverket i Holmedal. Og plukka så opp Connie og Olaug i Holmedal. Vi gjekk opp kraftvegen og nord til Liset/Nedgardstølen. Ei relativt lett økt for å kome i gang. Sjekka så ut på ut.no før turen gjekk vestover myra. I søraust-enden av sjølve Smørskornova er her ei bratt rute/skårar opp som eg nytta før om åra når eg kom denne vegen. Vi beit tennene i hop og kom oss greitt opp etter nokre pust i bakken.... 😅Det er flott utsikt frå Smørskornova. Her bildeserie

Etter namn i fjelltrimboka og ein matbit, gjekk så turen ned på sørsida av fjellet og aust/nordsida av Langevatnet. Så vidare til Siklabergvatna. Fantastisk flott turterreng her den gamle DNT løypa frå Stongfjorden til Nipebu går. Vi hadde oss ei liten pause ved vatna. 

Turen vidare gjekk så opp bakkane i vest til Mannskaret. Så vest og opp dei mange høgdedraga til Fanafjellet. Her opnar det seg opp flott ustikt mot Dalsfjorden og Holmedal/Straumsnes. Og på Fanafjellet dukkar heile øyriket ute i havet opp. Fantastisk! 

Fanafjellet - Olaug, Connie og Velaug

Nok ein matpause måtte til på Fanafjellet. Deretter bar turen ned bakkane til Fagredalen. Vi kryssa elva nord om Hålandstølen, og gjekk aust til Bakkestølen og følgde ruta sørover. Ved Tingstusteinen var det ny sjekk ut post for TiTur Dalsfjorden. ¨

Ja timane hadde floge av garde. Og klokka var allereie blitt 20.45 då siste post var unnagjort. Frå Holmedal vart det så ein ekstra tur til Rivedal for Velaug og underteikna for å hente bilen som stod der. Ei nydeleg og krevjande runde var i boks. Takk for følgjet til damene 😄

Foto Liset/Nedgardstølen, Smørskornova, Fanafjellet, Tingstusteinen 150524

TiTur Dalsfjorden Atløynipa

Eg har opp gjennom åra skrive fleire blogginnlegg om turar på Atløyna. Mellom anna Creme de la Creme. I år står Atløynipa på programmet for TiTur Dalsfjorden. Og i dag gjekk broder Sillan, svigerinne Tone, Olaug og eg den flotte turen frå Eide til Nipa. Veret var delvis skya, god temperatur og sola stakk seg fram ut på dagen. 

Som før om åra må eg berre få gi ein stor applaus for stirydding og merking av løypa. Ja, forsyne meg hadde ein brukt kantklyppar langs vatnet og eit stykke opp i skogen. I tillegg var her lagt ut ny plank og steinsett myrar lenger oppe i fjellet. Imponerande. Når ein veit kor fort havskodda sig på her ute er dette eit veldig viktig sikkerhetsmoment for at folk kan ferdast trygt (sjå bildelink).

Elles hadde vi ein flott matpause på toppen i den varmande sola. Ein veldig kjekk og sosial tur. Tusen takk for turen. 

Foto Atløynipa 120524

TiTur Dalsfjorden til Furefjellet

Herlig TiTur Dalsfjorden tur med Olaug til Furefjellet på Staveneset i ettermiddag. Dag Tore Mjåseth har laga ei ny rute opp som ein avstikkar frå ruta til Høgeheia. Veldig bra. Tidlegare har eg ofte gått på Furefjellet etter først å ha gått på Høgeheia. Då føl ein meir høgdedraga mot vest. Den nye ruta opp frå Holevika føl fint opp bakkane frå nord. Det er flott utsikt frå Furefjellet. Sjå video. 

Veret i ettermiddag var perfekt. Overskya, nesten vindstille og god temperatur.  

Foto Furefjellet 110524

TiTur Høgevarden i Flekke

Dagens selfie

Ganske tjukk skodde på Høgevarden i dag tidleg

Eg tok turen til Dale og vidare til Stav i dag tidleg og gjekk på TiTur posten på Høgevarden. Trur ikkje eg har vore på dette fjellet før (?)... Det var opplett, men ein del skodde. Spesielt oppe mot toppen. Då var det veldig kjekt at det var godt merka med merkestenger over skoggrensa. Applaus! Dessutan var stien synleg. Elles litt vått i enkelte parti. Flott og grei tur for dei aller fleste dette.  

Fantastisk TiTur kveld

Velaug, Connie, Sissel, Olaug og unterteikna på Vidsyn 

Fredensborg

Eg slo følgje med Fjellgeitene på ein flott TiTur "ekspedisjon" på sørsida av Dalsfjorden i går ettermiddag. Med tjukk skodde på morgonen heime, var turen litt usikker. Men det letna litt utover dagen. Og med ferjeavgang frå Askvoll til Fure 15.15 såg det lysare ut i veret. Seinare på ettermiddag og kveld vart det retteleg flott med sol og vindstille vèr. 

Vi starta første post på programmet frå Furset til dagsturhytta Vidsyn. Det var god og tørr sti heile vegen opp. Ein ganske lett tur på ca ein halvtimes tid. Vi trefte kjentfolk då vi nærma oss hytta. Her oppe er det nydeleg utsikt. Rett nok låg det skodde i nord og delvis i vest, men sola varma i det vindstille veret. 

Etter ein liten pause bar det så ned igjen same vegen og ein biltur til Fredensborg på Tysse. I eit fantastisk kveldslys, og blant nydelege tre og i gamalt fargerikt lauv, vandra vi opp den korte vegen til posten. På Fredensborg ligg det ein privat gravplass. Her har det nyleg blitt saga ned to eldgamle tre som ikkje skulle fjernast. Nokre gedigne trestubbar står att framfor plassen! Diverre går det ikkje alltid som planlagt i Fjaler kommune... 

Fredensborg

Vi sat ei lita stund her oppe i det flotte kveldslyset før turen gjekk vidare til Haugland. Her vandra vi ut stien langs fjorden til Polleneset. Også her traff vi kjentfolk som var innom posten i den praktfulle kvelden med kveldsol, svaberg og vika med sand. Ein flott badeplass vi brukte i gamle dagar der vi kom med båt frå Dale. 

Fjellgeitene på Polleneset

Med dette var fekk vi registrert tre postar på årets TiTur. På ein aldeles nydeleg vårkveld. Vidsyn, Fredensborg og Polleneset er greie og lette turalternativ for folk i alle aldrar. 

Foto Vidsyn, Fredensborg, Polleneset 050524

Tøffe damer

Litt forfrosne, men med tørre klede....

 

Regnet er over, men svate skyer ligg att i nordvest|

Det vart eit rimeleg kald og våt tur opp den gamle ruta "mi" frå Neset i Stongfjorden til Fanafjellet i dag. Ei solid regnbyge og ditto vind møtte oss ovanfor skoggrensa ved Langedalen. Midt i mot. Så det vart både kaldt og vått! Ja, valne nevar òg. Heldigvis hadde både Tordis, Olaug og eg med oss klesbyte. Så på toppen vart det fullt skifte! Men etterpå letta det heldigvis opp igjen. Og ned att måtte nokre av klede av. Ja, slik er våren. Frå vinter til sommar og tilbake. Men no er heldigvis vèrmeldingane veldig gode nokre dagar. Fin og tøff tur!

'Foto Fanafjellet 010524