onsdag 13. august 2008

Nye vardar på Driveknolten

Solnedgong ved Skålefjellet og Stølsfjellet tidlegare i sommar Utsikt mot Øyna og Bortheim frå skaret opp ved Høgknolten på vegen mot Driveknolten Eg traff på Vigdis mot Driveknolten i kveld. Kjekt med selskap etter gamalt. Ho hadde gjort ein flott jobb med varding innover Heileberget mot Driveknolten dei par siste dagane. På returen frå Nipebu i sommar, ilag med Olaug, Peter og Andreas, merka eg behovet for fleire vardar. I tjukk skodde er det ikkje heilt enkelt inne på Heileberget. Og skodda kjem veldig fort på her inne. Den flate og småkuperte landskapen "flyt" veldig i eitt i dårleg sikt. Vi gjekk sjølvsagt i lag resten av stykket inn og ut igjen. Det heldt seg opplett heile turen til vi var komne tilbake til vegen for kraftverket. Eg gjekk kun i shortsen i kveld. Men sommarregn på naken hud er berre oppfriskande. Nesten litt moro. Men eg får vere snar å føye til - når ein slepp å gå våt lenge og vegen heim er kort... Elles er det vel ikkje så mykje å fortelje heim om. Turen gjekk lett og greitt, formen er jo bra! Vi slepp å vente på kvarandre... Vi har jo vore inn mange gonger begge to. Som tidlegare nemnt skal det bli godt å få skifta ut fjella i fjelltrimmen snart. Litt småleie? Men det er no so - enkelte har jo gått litt meir på dei enn andre...:-)

tirsdag 12. august 2008

Trippel dose

MMS frå Skålefjellet i stad Det slo meg i ettermiddag at Skålefjellet blir eg ikkje lei av å gå på. Sjølv om det var tredje kvelden på rad. Dette kan vere litt variabelt med dei andre fjella eg har trakka i det siste. Det er noko spesielt med Skålefjellet. Det ruvar så flott over bygda. Det er god sikt til bygds frå toppen. Likeeins ut fjorden og til havs. Du tenar fort høgdemeter på turen oppover. Det tykkjer eg alltid er godt. Omlag som i Rørvika mot Blegja. Skålefjellet ser eg dessutan godt både frå senga og sofakroken heime. I skrivande stund ligg fjellet der oppe bada i raudt kveldslys frå solnedgangen. Vakkert...Romantisk... Som skapt for draumar... Fint var det òg å gå opp i stad. Eg gjekk like godt i gore-tex joggeskoa, sjølv om det var litt vått. Det går lettare då enn med fjellsko. Gjer jo ingen ting å bli litt våt på føtene så lenge temperaturen er som den er og turen ikkje tek meir enn maks eit par timar. Opplett og gløtt av sol undervegs. Ingen vind. Eg sat faktisk ei stund i bar overkropp på toppen og naut utsikta og roen.

mandag 11. august 2008

Friskt, vått og godt

Nok eit eksempel på Dalsfjorddekket frå Devontida på Skålefjellet (mms) Vèret var egentleg så ustabilt og ille i bygene at eg likegodt gjekk opp igjen på Skålefjellet i kveld òg. Det hølja ned oppover Gjerdedalen og heilt til topps. Der var i tillegg skodda så tjukk som graut. Men det er sjølvsagt ingen problem med vegen når vardane står så tett som no... I utgangspunktet var eg tenkt meg innatt på Driveknolten frå Rivedal. Men eg føretrekkje Skålefjellet framfor Driveknolten når det er så mykje regn og skodde som i dag. Det går fortare opp og det er lenger og meir vèrutsett innover Heileberget. Slike dagar som i dag er valet enkelt... Som nemnt i går er det sleipt oppe i brattaste bakken i Gjerdedalen. Stien er godt opptrakka, men våt mold og gjørme gjer den farleg glatt ned igjen. Eg la på plass litt stein i kveld, men det må meir til... Så obs, obs - eg ramla på rompa i kveld òg! Snublefot...:-)

Sosial Søndag

Bilde frå fellestur på Skålefjellet tidlegare i sommar. Peter først... Det var tromma i hop til dugnad på "jubileumsløypa" i Stongfjorden i dag. Den går frå fotballbana opp mot Trengjeskaret og over Stongsåsen til demma. Trassèen går vidare på nedsida av overløpet ved Stongsvatnet og inn på den gruslagde vegen som SFE (Sogn og Fjordane Energi) har laga ved Likkjevatnet. Så over den regulerte "elva" og nyebrua og vestover grusvegen. Siste delen av løypa går over åsen til inntakskammeret og ned ved sida av røyra til kraftstasjonen i Stongfjorden. Eg må unekteleg innrømme at det er litt spesielt å legge ned dugnadsarbeid på turløypa i forbindelse med den gamle kraftreguleringa i Stongfjorden. Dei fleste som kjenner meg veit vel kva eg tykkjer om slikt. Men no er no dette ein gong slik. Og gjort er gjort. Turløyper får ein iallefall ikkje nok av anten dei er lange eller korte. For ungar eller eldre. Og denne turløypa kan vere flott for alle. Det er dessutan meining at stien skal gå inn som ein del av nordsjøløypa Vi var 4 stykke som stilte, Grunde (sjef), Tor Vidar, Kjell og underteikna utstyrt med sakser, økser, og raudmåling gjekk vi grundig til verks. Det var ei kjekk ykt med innlagt kaffipause halvveges. Kjell hadde fiksa kaffi og kjeks til oss alle. Bilder og tekst finn du på bloggen til Kjell. Etter middag var det kaffi hos Elsa og Einaren. Elsa hadde dag. Tove og Terje var komne på ein ferietur frå Trondheim, så vi var ein heil gjeng. To blautkaker og anna kaffi-mat freista sjølv den mest standhaftige...:-) Ei fin stund. Men noko vidare sveitt opplegg hadde det ikkje vore for meg. Etter kaffien fekk eg difor dispensasjon heime til å ta meg litt meir ut. (Olaug hadde jo vore på Blegja med Anne S. tidlegare på dagen....) Så sidan eg hadde kome så godt i gang med ryddesaksa, tok eg likegodt denne med meg på Skålefjellet. Eg gjekk opp Gjerdedalen som vanleg. Til å begynne med såg vèret brukbart ut. Men litt lenger oppe i dalen begynte det å hølje ned. Og det regna så det spruta mesteparten av vegen opp. Men tru det eller ei, så klårna det opp på toppen (som regel har det brukt å vere omvendt...:-). Frå toppen såg eg difor sola først på Holmedalsfjella. Før den nokre minuttar seinare stakk fram lenger her nord. Utruleg skiftande! Eg la frå meg saksa ved hammaren ved første elva på veg opp. Nedatt tok eg såleis føre meg å klippe einer og busker ved hammaren. Ikkje minst den bratte bakken under hammaren, og ned ved elva, heldt aldeles på å gro til med småbjørk. Eg saksa ned for fote. Diverre heldt kvelden på å ryke til for meg. Tida til stirydding strekk aldri til... Det skulle vore gjort noko med den brattaste bakken lenger nede. Stien er bra oppgådd no, men svart mold med væte er reine skøytebana. Eg hamna på ræva to gonger ned her i kveld. Og det er ikkje første gongen. Heller regelen. Litt stein/steinheller hadde gjort seg på verste plassane. For andre lokale som eventuelt les dette, så legg gjerne på plass ein stein når du likevel går opp. Det skal så lite til hvis fleire tenkjer på det!

lørdag 9. august 2008

Folksomt på Blegja

Sola stikk gjennom på toppen. Heilevangstaurane i bakgrunnen. Bratt ned igjen til Rørvika og Førdefjorden. Utsikt mot Rørviknipa. Løypa sørover går gjennom skaret ved snøflekken t.v. Det er godt varda herifrå og heilt til toppen... Det var ein liten nedtur å sjå ut glaset i 6-tida i dag tidleg å registrere at det var heilt overskya og vind. For eg hadde bestemt meg for å gå på Blegja før eg sovna i går kveld. Med utsikt til Skålefjellet, låg eg difor ei stund lenger i senga og funderte på alternative planar. Dale-tur låg nærast i korta. Dalsfjord-veke som det er og alt... Ein times tid seinare var det likevel eit mykje lysare skylag ute. Og vinden var stilna av. Då bestemte eg meg for å gå likevel. Omlag klokka 8 var eg på plass i Rørvika. Ingen andre hadde parkert endå. Eg hadde teke på meg superundertøy på beina med shortsen ut igjen på. Ovantil gjekk eg i bar overkropp. Det var overskya, men veldig finn temperatur å gå oppover i. Så eg toppa ut før kl 10 utan problem... Litt småstopp for fotografering hadde det vore òg. Hadde det gått så lett opp nokon gong før? Spørsmålet hang i lufta... På toppen låg det eit tjukt skoddelag på sørsida. Men på nordsida mot Førdefjorden var det klårt. Berre nokre lette skoddedottar fauk forbi Rørviknipa. Sola var stort sett fråverande så tidleg. Heldigvis var det heilt stilt. Utsikta var formidabel i det klåre nordadraget. Havet og himmelen ute i vest knall blå. Likeeins innatt Førdefjorden og mot Rørvika og Vevring. I dag vart eg difor verande ei heil stund på toppen, tok bilder, naut utsikta og inntok litt turmix, XL1 og banan. På veg ned igjen gjekk eg aldeles mot folkestraumen. Første paret traff eg nedom Nipevatnet. Sidan gjekk det slag i slag. Pulje på pulje med folk. Sikkert bort i mot 20 stk totalt. Enkelte hadde visst starta seint. Eg traff faktisk folk som skulle oppover då eg var komen heilt ned igjen. Somme hadde nok registrert at vèret skulle bli betre ut over dagen. Ja, ja kvar sin smak... Eg føretrekkje no helst overskya og låg temperatur oppover dei bratte bakkane, istaden for steikjande sol... Og så går ikkje heile dagen med. Men det er jo greitt at sola dukkar opp lenger oppe mot toppen der fjellufta har ein annan temperatur enn ved havet. Eg var heime igjen til lunsjtider. Så då fekk eg 2 mål oppkappa bjørkeved som låg på tunet frå i går i hus òg.... Flott tur. Reine standard-opplegget med Blegja òg no...
Blegja 090808
Blegja 090808_Video

fredag 8. august 2008

Ein svipptur

MMS frå Kvamsnipa i ettermiddag ...opp på Kvamsnipa i Skjerlia på veg heim frå jobb, og ei ny runde tikka inn på fjelltrim-kontoen min. Ikkje så mykje å fortelje akkurat. Forholda var nøyaktig som på Driveknolten i går. Likeeins klesdrakta. Så får vi sjå kva vi finn på i morgon. Vèrmessig ser det jo lovande ut, men med nordavind på kysten og på toppane. Litt gråare for søndagen...

torsdag 7. august 2008

Frisk pust i nordavind

MMS frå Driveknolten i ettermiddag Sidan eg vart dimmitert frå guide-jobben på Blåfjellet i ettermiddag, fekk eg tid til å stikke inn på Driveknolten frå Rivedal og deretter Fristadfjellet i Askvoll. Ein ganske kald nordavind gjorde det heilt i grenseland å gå inn i berre shortsen. Men det går både lettare og fortare når eg går så lettkledd. Og blir heller ikkje så våt av sveitte. Nordavinden var frisk å puste i og lufta minte om haust. Sikta var krystallklår. Til fjells gir fargane no bod om ei ny årstid. Hausten er ei flott tid i fjellet. Kanskje den flottaste av alle... Det var endå meir vind opp på Fristadfjellet. Sjølv med lett jogg inn Askdalen måtte trøya på. Då sola forsvann bak ei sky, var det faktisk gansk kaldt,. Det gjekk fort opp bakkane, og nedatt vart det småjogging heile vegen....så eg akkurat nådde Kiwi;en...!

onsdag 6. august 2008

Siste dans

"Hytte-varden" ved toppen av Skålefjellet Etter at Olaug, Marie og Peter reiste på den lenge planlagde og forlenga helgeturen på hytta til Kirsten og Arnt, tok eg opp på Skålefjellet. Framleis enkelt kledd i shorts og joggesko... Det går litt lettare då på alle måtar. Det er jo vorte ein standardtur dette òg, ilag med dei andre toppane i fjelltrimmen. Som tidlegare nemnt skal det snart bli greitt å få skifte fokus... Nytt positivt fokus! Men som trim er turen veldig bra... Og målsettinga mi er endå ikkje heilt oppfylt.

tirsdag 5. august 2008

Russarar på Blåfjellet



MMS frå Blåfjellet i ettermiddag

Diverre var seglskutene på Tall Ship Races forseinka til Askvoll òg i dag. Men den guida turen vår på Blåfjellet gjekk likevel då det dukka opp 7 russarar frå båten Akela. Fin gjeng. Gode i engelsk. Og dei gjekk heilt greitt i bra tempo opp på Blåfjellet.

Her er det fin utsikt mot Alden, Granesundet, Staveneset, Atløyna og deler av Askvoll. Russarane var både blide og nøgde. Han eine lurte på kor baren var då vi kom opp... For kva gjorde vi der oppe utan? Men vi hadde berre vatn med oss i sekken. Russarane var vel kanskje like vane med anna blankt drikke...:-)

Vi var tre guidar på turen. Med så få deltakarar vart eg dimmitert nedom første bakken på veg ned igjen frå toppen. Mål: Fristadfjellet. Eg sprang difor nordaustover og over på hi sida av Askdalen. Her gjekk eg opp den vanlege stien. Det var eit skikkeleg regnveir oppover. Eg gjekk berre i shorts og goretex jakka. Men med god temperatur var det heilt flott. Det var herleg og lett å springe vegen frå toppen til parkeringsplassen ved kyrkja heim igjen.

Kjekk og frisk tur!



Blåfjellet_Fristadfjellet 050808

mandag 4. august 2008

Ei lita markering



Lettskya på Fristadfjellet i ettermiddag. MMS.

Eg hadde meg ei lita tankemessig markering av den fullførte runda på Fristadfjellet i ettermiddag. Eit lite og nytt personleg mål var nådd. Men eg skjønar at eg snart må dedikere nokon av desse rundene til Olaug. Ho fungerer både som husmor og legen si høgrehand, medan underteikna flyg fjelltoppane og ikkje er heilt ned på.... Heime er nok saldoen på minussida etter fjellracet siste månadane! Men mottoet mitt blir likevel som "So ist dass Leben, kurz aber so heftig"... Det må vere trasig å svinne bort i ein stressless....

Noko anna er at eg no ser fram til hausten. Flotte fargar, klar luft, så inderleg fri fluger, klegg og flått, frisk temperatur som er lett å puste i, borte er tunge, sveitte og dunkande hovud... eg kunne ramse opp i det uendelege.... Men ikkje å forgløyme nye fjell på fjelltrimmen. Det går litt på motivasjonen laust no, må eg innrømme. Egentleg har eg berre eit mål igjen på sesongens fjelltrim. Det er òg innan rekkevidde, hvis ikkje noko uforutsett skjer...

I morgon og torsdag blir det fjellføring på Blåfjellet i Askvoll under Tall Ship Races. Eg ser føre meg nokre fine seglskip-bilder der i frå...