Mimrestund 2

 

Med Agnar på Straumsnes rundt i fjor

I fjor sommar vart eg med Agnar Åsnes på Straumsnes rundt. Vi var vel oppom dei fleste fjella her. Dette er ein tur eg hugsar godt, sidan eg som totalt ukjend på desse traktar fekk oppleve Dalsfjorden og fjella i Askvoll frå ein heilt ny vinkel. Så i dag mimrar eg litt over denne turen. 

Blogg, foto og video her.

Morgonen starta forresten lenger ute i fjorden då dagsturhytta Vidsyn vart besøkt i høve TiTur Dalsfjorden. Ja, jammen er det fint på sørsida av Dalsfjorden òg.... 

Dagen i dag var som dei førre 14 dagane - ein god times tur inn Solsidevegen i Stongfjorden og heim igjen. På rehabiliteringsruta mi... 

Lindhammaren i dag - 
men i dag var kyrne lenger nede i bakkane....

MImrestund

Ei lita mimrestund frå ein flott juli-tur med tysk selskap på Nipebu. Inkl lokalt treff. Her fyldig blogginnlegg med mange foto - Sjå fyldig blogginnlegg

 

Immobile

Frå mimretur i juli i 2008 -
her på Driveknolten på Heileberget-
etter å ha vore på Eitrenipa og Blegja i bakgrunnen...

Det har blitt juli. Høgsommar. Og sola har snudd. Som framleis noko immobil avgrensar turane mine seg stort sett inn Solsidevegen til endes og heim igjen. Halvannan time eller så. Men no kan eg etter kvart peise bra på heile vegen. Er litt meir forsiktig i dei meir ulende partia innom Blomberg. Likevel -  det gjer godt. 

Frå ruta aust om Blomberg i dag

Kyrne trivst veldig godt her på Lindhammaren - dei ligg ofte her om morgonen - og ingen klagar på utsikta...😃

Sidan juli månad er her, og som sagt turlivet mitt begrensar seg, så kan eg mimre litt om denne månaden òg. 

Ein juli-tur eg hugsar godt, og som er vèl blogga, var tilbake i 2008.  Den gjekk frå Rørvika til Blegja, deretter via Blegjaskaret til Synste Stauren, ut Blåegga til Eitrenipa, ned Eitreskaret og Massbu-ruta til Nipebu. Der i frå sørover og via Svartetjønna til Heileberget, Driveknolten og til Rivedal. Turen med bilder finn du her. 

Det var ein knallvarm sommardag. Litt kjekt å sjå tilbake på. Og noko krevjande ja...  Men det er jo slik med fjella våre her ute - turane kan ein gjere akkurat så lange som ein vil. Og over helga skal eg iallefall prøve meg litt lenger enn i dag - men om eg nokon gong vil gi meg i kast med ovannemnde rute er vel heller tvilsomt - iallefall på ein dag..😎

Helg igjen...

God morgon og God helg frå min faste vandringstur på Solsidevegen i Stongfjorden. Turane går raskare og raskare. 

Over helga prøver eg meg nok meir til fjells...😃

Juni

 

Då har eg laga ein bildeserie for juni månad òg - 

saman med andre månader.

Dei ligg samla oppe til høgre på bloggen. 

Progresjon 3

Svartevatnet i dag 

Inntaket til fiberen rauk på fredag, så utan Internett er dette eit livsteikn via blogg på mobil. Litt krøkkje må vite... ... 

I dag er det tre veker sidan operasjonen min. Eg får seie at eg skundar meg langsomt til å gå/springe i fjella igjen. Men set no ekstra pris på langsame småturar. I går på Rinda. I dag litt lenger til Svartevatnet. Det gjer godt. Ikkje særleg tungt heller. Sjølv om muskelmassen, spesielt i føtene, er redusert. 

I løpet av ei veke eller to skal det bli mykje betre. Veit at eg vil sette ekstra pris på turane framover... For ingenting varer evig, veit du.... Berre fjella består! 

 

Progresjon 2

Fekk endeleg henta meg ut årets TiTur-skjorte etter fullført runde i mai...😎

Kyrne har det godt på Lindhammaren

Litt sjølvskryt i dag òg. Hjelpe på motivasjonen etter operasjonen... Heile runda inn Solsidevegen til Lindhammaren og Blomberg og heim igjen i dag. Ok - forsiktig og labert tempo. Men boost for dagane som kjem. Og snart skal eg opp igjen i høgda... Solsidevegen er jo fin å gå den - både for liten og stor - og folk i ein healing prosess...😃  

Progresjon

Ei viss form for progresjon i dag då Olaug vart med meg inn Solsidevegen. Litt meir tòl og tid til hjelp så er eg nok snart på fjellet igjen. Pusten finn eg nok att. Det går likar no...😃 

M/S Stangfjord

Flott og høgtideleg markering i Stongfjorden 14/6-16 då M/S Stangfjord kom heim frå Hardanger Fartøyvernsenter der den har lege til restaurering. Båten er ikkje heilt ferdig, men skal få siste hand på verket på Jensbua, ytst i Flekkefjorden. I tillegg skal det på plass ny motor. 

I helga er det dugnad på M/S Stangfjord. Dekket skal pussast og smørjast, Båten ligg ved kai ved Jensbua. Og det blir lova lunsj og god stemning. 

M/S Stangfjord kom heim til Stongfjorden 14/6-2016. 

Blogginnlegget med mange bilder finn du her. 

Jonsoknatt under hammaren

Jonsokbålet er tent under Svartetjørnshellaren - 
Fossedalshengenipa i bakgrunnen

Eg har hatt mange overnattingar under hellarane i Fossedalen. Fleire gonger under Svartetjørnshellaren. Men også under Kallhellaren ved Svortevikstølen i nord. Og under hellaren ved Osen i sør. 

Spesielt åleine synest eg det er ei god og stille ro å finne under desse hellarane. Godt vitande at her har det overnatta og levd fangstfolk og vandrarar langt tilbake til steinalderen. Utan å overdrive er det nesten som ein kan høyre dei prate i nattestilla.... Sjølv kjenner eg ein viss slektskap til Haugtussa av Arne Garborg. 

Under panna fager men låg
lyser augo som attum eim;
det er som dei stirande såg
langt inn i ein annen heim.

Midtsommar i 2016 gjekk eg turen frå Skorvemarka til Svartetjørnshellaren med overnatting under hellaren. Dagen etter vidare til Fossedalen og Dalsfjorden. Blogginnlegget kalla eg Jonsoknatt under hammaren.