Bildefilm frå Fossedalsområdet 29/8

  

 Eg sette i hop ein bildefilm frå den flotte turen på lørdag.

Sosialiseringsrunde

Mobilfoto - Tone, Leiv-Jørgen Løseth og Sillan - Leif-Jørgen har gjort ein kjempejobb med merking av stiar i Flekke-området 

Mangevatna

I dag vart eg med Sillan og Tone på TiTur Dalsfjorden toppen på Skylefjellet. Ja, ok, eg har vore her nokre gonger før... (Turen i går sat litt i føtene....) Men som vi veit har vi mangt slags turar - springeturar, blodsmakturar, trasketurar, filosoferingsturar og sosialiseringsturar. Når alt kjem til alt er kanskje det siste viktigaste turen. Den du går undervegs. Til eit mål. Eller at livet er akkurat der og då - og ikkje ein gong i framtida. For til slutt er ein no framme ved enden likevel....

Og i dag var visst dagen for sosialiseringstur. For maken til folk på tur her oppe har eg vel ikkje sett før. Dei fleste på sjekk inn TiTur Dalsfjorden toppen... Alle med god tid i det nydelege vèret. Tid til å prate, le og skøye - og vi traff ingen av  "rennetypefolket"... Ok - eg strevar litt med dette sjølv - å gå seine turar. Som pensjonist treng eg vel ikkje stresse med å kome meg fortast mogeleg til noko som helst. Kanskje er det nettopp dette som må vere mottoet for resten av livet òg... 

Innerste inne var såleis dagens Skylefjell-tur ein av dei kjekkaste eg har hatt! Vel -  det var ikkje solnedgang. Ikkje hadde eg nokon å halde i handa heller. Men det er vel egentleg ingenting som er kjekkare enn å treffe mange blide folk på fjellet. Dalingar og Flekkingar i fleng! Som har litt tid til overs....

Video Mangevatna

Video Skylefjellet 

 

Kremtur

Ved Fossedalsfossen i dag

Utløpet av Atlevatnet

Atlevatnet med Fløyen Nonsholten og Driveknolten mot høgre

Nipebu

Øvre Fossedal og Nordre og Søndre Kringla

Fossedalsfossen

Nedre Fossedal 

Frå Dalsfjordbrua ser vi m.a Fossevika, Kringla, Blegja og Laukelandshesten 

I dag tidleg gjekk eg den fantastiske runda som vist på bildelinken under. Start i Rivedal ca 08.15. Kyrne kosa seg inne ved elva i Vagstaddalen. Elles var det noko vått inn over. La Sportiva Raptor skorna sat likevel bra på dei våte steinane. Og dei heldt seg faktisk tørre heilt til Fossedalsvatnet. I all væta som var på ruta.... 

På Nipebu var det folk som hadde vore opp på dugnad. Eg slo av nokre ord. Men gjekk så vidare Massbu-ruta til kloppa på sørenden av Krokavatnet og ned i Øvre Fossedalen. Deretter strake vegen til vassenden på Fossedalsvatnet, der eg tok meg eit par skiver ved fossen. Sjølvsagt med nokre fotostopp undervegs. 

I Nedre Fossedal var de ikkje folk etter det eg kunne sjå. Etter nokre bilder gjekk eg så til Fossevika og stien til brua. Her traff eg folk. Og fekk meg ein hyggeleg prat med eit "kjendispar" på veg til Brendeheiknappen. 

Frå brua til Dale og Allmuen er no i grunn verste stykket å gå på denne ruta...😎Her hadde eg avtalt ein kopp kaffi med broder Sigvard. Han køyrde meg så til Rivedal igjen etter bilen. Fantastisk flott tur. Delvis skya og god gå-temperatur. 

Foto Rivedal Nipebu Øvre&Nedre Fossedal Otterstein Dale 290820

Mobildataen streike visst gjennom Fossedalen....😆
 

Augustidag over Dalsfjorden

Nydeleg morgontur på Bakkefjellet igjen i dag. Frisk og klår luft med litt sol. Haustleg i lufta, men sola varma i bakkane. Fantastisk å sjå den stille Dalsfjorden blenkje seg i morgonlyset. Stille bygder spegla i fred.  

Om å bli teken på senga....

Turbinane på Guleslettene sett frå Toreheia - over 33 kilometer unna...

Toreheia i dag

Motiv frå ruta mellom Toreheia og Skylefjellet

Mangevatna sør for Skylefjellet

I går gjekk eg ruta til Blåfjellet og Eggene i Askvoll. Vått og ein del gjørme. Men jammen vart det litt sol òg. Flott!

I dag tok eg turen frå Vågane og opp til Ytrevågefjellet, vidare til Toreheia og Skylefjellet. Ei rute eg likar veldig godt. Diverre skjemmer vindturbinane på Guleslettene no synsranda nord for Florø. Over 33 kilometer unna! Desse turbinane er 158 meter høge. Kan du tenke deg korleis turbinane på Lutelandet som no blir sette opp vil vise att i Askvoll både frå sentrum og kring om frå fjella? For ikkje å snakke om på Atløyna? Turbinane på Lutelandet er over 180 meter høge og ligg berre 7-8 kilometer unna kommunen... Turbinane vil bli eit skrekkscenario. Ja, mange her i kommunen vil bli tekne på senga! 

Elles såg sauene i området ut til å ha det bra. Det gjekk mange på nordsida av Toreheia. Også ved Krikavatna gjekk det fleire. Flott tur igjen!

 Foto Ytrevågefjell Toreheia Skylefjellet 260820

Sturtebyer

Sjå jammen letta det oppe på toppen av Bakkefjellet i dag - her Dokka og Moldura

Sturtebyene på veg inn fjorden til Dale

Straumsnes og Holmedal

...og så dukka regnbogen opp òg...

Det kom nokre voldsomme sturtebyer både på Skylefjellet i går og Bakkefjellet i dag. Men i motsetnad til i går snudde vèret tvert om på toppen. Ja, eg fekk til og med sjå sola nokre minuttar frå Bakkefjellet i stad. Slikt gjer godt når alt er vått...😀

Mobilfoto Bakkefjellet 240820 

Før "Ellen"

 I dag vart det ein tur til Askvoll igjen og ein kjapp tur på Blåfjellet og Eggene. Sånn cirka rett før lågtrykket "Ellen" med torevèr og bøttevis med regn ramlar inn over oss. Forsmaken fekk eg allereie oppe på fjellet der sørausten tok godt tak. Likevel - vinden var ganske så varm. Og ikkje verre enn at det var heilt passeleg med shorts og t-skjorte. Det er i grunn ganske lett å springe i den slags utstyr...😎 Og ekstra fint å sitte i sofakroken heime etter endt trimøkt når det lynar og regnar ute...

Lett på Fossedalshengenipa

Foto Fossedalshengenipa 200820 

Det er ein ganske lett og grei tur på Fossedalshengenipa frå Skorvemarka. Ein heilt annan tur enn å gå gjennom Fossedalen frå Dale. Så eg gjekk meg ein rask morgontur opp hit i dag tidleg. Men eg kutta ut å gå til Nipebu etterpå. Noko eg egentleg angra litt på då eg kom ned igjen. For vèret var veldig bra. Stilt og delvis skya med tidvis sol. Og det var jo framleis tidleg på dag....Uansett - dagens trim i boks.

Go ahead Dokka

Selfie inkludert flygemaur

Nydeleg tur opp ranen på Dokka i dag tidleg. Retur om Nyksvatnet. Stilt, delvis skya og god temperatur. Tørr og fin sti. Ei nydeleg runde. Go ahead! 

Eg vart møtt av ei runde med svermande flygemaur på toppen. Desse kan vere ganske innpåslitne (sjekk selfie inkl. maur...😄). Elles traff eg på eit par blide damer ovanfor Vikastølen. Sjølvsagt med ein liten kjekk passiar. Så var det heim att å lage middag...

Foto Dokka 180820 

Stilig gjennom skodda

Vi ser toppen av Atløyna over skodda.

 

Her ser vi Moldura og Dokka bakerst og Kultingane og Fristadfjellet fremst.

Eg gjekk meg ein tur gjennom skodda i dag tidleg òg. I dag på Blåfjellet og Eggene i Askvoll, sidan eg hadde eit ærend der nede likevel. Stilig å gå litt småhutrande gjennom skodda i shorts og rett opp i strålande og varm sol. Som i går låg vel skodda heilt frå fjorden til omlag 400 moh. Artige turar dette!

Fint over heia heime

Mellom Toreheia og Ytrevågefjellet i dag (mobil)

Video Toreheia (mobil)

Flott og lett tur over Toreheia og Ytrevågefjellet i dag heime i frå. Retur til Vågane. Og som tenkt gjekk eg rett gjennom skoddelaget ved fjorden ovanfor Rinda. Herleg å gå gjennom skodda på morgonen, og kome opp i knall sol og blå himmel! 

Som forventa går det ein del sauer i skuggepartiet på nordsida av Toreheia. Kjøligare her. Og friskare gras sidan snøen ligg lengst på denne sida. Elles går det sauer litt rundt omkring. Både ved Krikavatnet og i lia mot Osland. 

Sauer i Kjennahola nord om Toreheia

Herleg med slike nydelege seinsommar-dagar!  

Lett og kjapt

Sauene har det bra på Bakkefjellet...

eg òg...😄

Eg gløymde visst å blogge turen på Moldura hin dagen. Ikkje at det betyr noko spesielt  - der har eg jo vore mange gonger før...😄

I dag vart det til ein lett og kjapp tur på Bakkefjellet i Holmedal. Også som før. Ganske tørt og fint. God temperatur og vindstille. Ja til liks med meg såg sauene ut til å trivast heilt utmerka. 

Mobilfoto Bakkefjellet 150820 

Blegja opp

På toppen

Rørvika

Litt klyving

Drikkepause i ura

Det ligg endå nokre snøfonner her oppe

Og blomar i ura - som eit lite høgdepunkt

ds

Meir klyving - og ein blom til høgre

Utsikt mot vest

...og til Dale

Panorama frå toppen med mange kjende fjell...

og Olaug jublar...

Heilevangsstaurane med Lisjehesten og Kvamshesten (Storehesten)

Mot Førdefjorden, Håsteinen og Gjøringebøfjellet

I dag var så turen komen til Blegja og normalruta frå Rørvika. Ruta er nyleg remerka. Det er veldig greitt for ukjende, men også fint for oss andre. Spesielt ned igjen urane. Dei kan jo vere litt tricky for eldre folk. Også for nylege pensjonistar...😄 

No var det Olaug som var mest gira på denne turen i dag. Eg er egentleg ganske lei desse urane her oppe. Og sist eg var opp var då eg la ut fjelltrimboka i oktober i fjor. Tidlegare år har det jo tildels vore eit renn opp hit for å sanke meg poeng til fjelltrimmen... Ikkje det - det er jo flott å stå på høgste punktet i kommunen. Fenomenal utsikt er det òg. I alle retningar. Men å gå opp og ned desse urane ser eg på nærast som ein transportetappe for å kome meg opp på toppen.  

Det var flott vèr på morgonen. Stilt og fint i Rørvika. Men det drog opp med nokre skyer då vi kom opp under Rørvikenipa. Godt då å ha nokre ekstra klede og vindtett i sekken. Og på toppen var det òg eit kjøleg nordadrag i lufta. Spesielt då sola forsvann. Så mange minuttane sat vi ikkje ikkje der. Vi åt eit par skiver før vi snudde nasen ned att same vegen. 

 

Eitt av høgdepunkta i dag var då vi traff på eit kull fjellryper under Rørvikenipa (sjå video). På akkurat same plassen eg filma eit kull hitt året. Så mange var det diverre ikkje igjen av årets kull. Forhåpentlegvis var det fleire som hadde gøymt seg vekk enn dei få vi fekk sjå. 

Elles er det no sjølvsagt alltid ei god kjensle å kome seg heim att frå Blegja-turar. Det er no høgste fjellet her og greier... Så Olaug er no strålande nøgd. Ok - litt eg òg... 😃Så då så...😎

Foto & video Blegja 100820