Reine påskestemninga

 

Det var reine påskestemninga på Høgeheia i dag. Tørt og fint i stien. Og solskinn. Vi har ikkje vore for mykje vande med det i det siste. Rett nok var det sporadisk litt is oppe mot toppen. Men ikkje noko å snakke om - det er berre å trakke ut om. Så her er det berre å ta turen både for liten og stor!

Gamle bilete

 På Møteplassen i Askvoll i dag hadde Audun Høvik teke med seg nokre bilete som var tekne av Paul Stang for over 100 år sidan. Onkel til Audun, Paul, var ein framifrå fotograf frå Stongfjorden. Og lenge før si tid. Tre av bileta som er avfotograferte her er tekne ved Krokavatnet og Tjuvbergsnova. Sistnemnde er kjend frå segnet om tjuvane som heldt til her og som røva i Fossedalen - dette er beskrive tidlegare fleire stadar mellom anna her

Det var veldig kjekt av Audun å ta med desse bileta. Vi tykkjer det er god historikk i slike. Og som ei flott oppfølging til innlegget om eitt av fotoapparata som Audun har i sitt eige etter Paul Stang. Dette kan du sjå på Stongfjorden sida her.

Audun hadde og med bilete frå Nedgardstølen i Rivedal frå ca 1920. Du ser dei under her. Menneska er ukjende. Kanskje dreg du kjensel på nokre. Teksten under følgde første biletet. 

Snøen som forsvann

Vi fekk nokre nydelege vinterdagar nyleg. Som forrige lørdag med solnedgang på Staveneset. Men no er her grøne bøar igjen, silande regnvèr og vind. Slik er vestlandet vintersdagen. Vi får ta det som det kjem. Uansett har sola snudd. Og snart set vi oss på eit fly sørover. 

Foto Alden og Staveneset x 4

Inga skam å snu

Morgonstemning på Staveneset med utsikt til m.a. Kinn, Reksta, Skorpa og Batalden

Det ligg mykje snø opp bakkane frå Holevika til Høgeheia

Vinterstemning på Staveneset

I dag måtte eg snu på veg til Høgeheia. Det var ikkje pust igjen. Og syra svei i føtene. Med dei snømengdene som låg opp bakkane frå Holevika måtte eg berre seie til meg sjølv at det var inga skam å snu. Med fine vèrmeldingar resten av veka skal eg gjere eit nytt forsøk på fredag. No veit eg kva eg går til. Og kjenner eg Høgeheia rett er snøen meir avblesen oppe mot toppen. Og no med spor opp der det ligg mest snø. Betre lukke neste gong...😎 

Godt Nytt År

Med januar i bilder ynskjer eg alle eit retteleg Godt Nytt År 🎇

Framsidebildet er frå Fløyen på Heileberget med utsikt ut Dalsfjorden. 

Fredeleg jul

 

Med eitt av bilda eg likar godt ynskjer eg alle ei fredeleg julehøgtid🎅 

Foto ved Litlevatnet på ruta til Toreheia/Skylefjellet

Fossedalen - der ingen skulle tru at nokon kunne bu

Gunhild Fossedal avfotografert i Jul i Sunnfjord 1993

TV serien "Der ingen skulle tru at nokon kunne bu" er velkjend med mange sjåarar. Det er eit kjekt program. Fjellgardane i Fossedalen på nordsida av Dale og Dalsfjorden kan godt gå under denne nemninga òg. Som så mange andre einbølte gardsbruk frå gamle dagar. 

I 1974, og lenge før nemnde TV serie gjekk av stabelen, laga NRK og Henning Rivedal program frå Fossedalen. Programmet som fekk tittelen "Titt eg minnest ein gamal gard" ligg framleis i arkivet til NRK. Filmen kan du sjå her. Det er ein flott dokumentasjon på livet i Øvre og Nedre Fossedal i si tid. 

Nedre Fossedal i dag

Elles hadde Jul i Sunnfjord eit fleire siders veldig kjekt og informativt stykke om Fossedalen i 1993. Det var ført i pennen av Atle Ness og Rune Dale. Juleheftet utgjeve av Sunnfjord Sogelag kan du lese digitalt her.

Øvre Fossedal i dag

Øvre Fossedal fotografert i 1934 av Astrid Fossedal - Fylkesarkivet
"det er som dei gamle husa ligg der og søv under dei store snødynene"

Fossedalen har elles eiga Facebook side - kalla Fossedalen - i grøne far. Her er det samla mykje stoff, soger, turtips. Under media mykje bilete. God lesnad!

Med desse orda ynskjer eg alle ei retteleg God Jul 🎄🎅

Perfekt 2.advent

Ved toppen på Gjelsvikefjellet med utsikt til Eitrenipa og desembersola.
Fløyen på Heileberget t.h.

Selvikestølen

ds

Gjelsvikestølen
Blegja og Synste Stauren t.h.

Nydeleg tur til Gjelsvikefjellet igjen. I dag i lag med Olaug. Omlag O grader og delvis frose på. Heilt klårt! Som dei siste turane gjekk vi ruta via Fesselia til Selvikestølen, Gjelsvikestølen og opp bakkane til toppen. 

Dei tidlege morgonstrålane av sol skein på Fossedalshengenipa og Markahengenipa då vi kom opp lia. Lenger oppe dukka Etrenipa opp der sola kikka fram i skaret i sør. Og endå litt lenger aust skein Blegja i morgonsol. Sola var allereie komen på Selvikstølen. 

Lenger oppe og i aust dukka Førdefjorden opp i tjukk skodde. Akkurat som sist. Og her var det litt meir austatrekk enn lenger nede. Ganske kald i draget. I tillegg låg det ein del snø der skaren ikkje heldt. Så ja, det var ganske tungt opp bakkane frå stølen. 

På toppen skifta både Olaug og eg kleda på overkroppen. Og fekk på oss dunjakkene. Herleg! Iallefall når du først har fått skifta...😄Ned igjen bar det same vegen som vi kom opp. No i nytrakka spor. Litt glatt var det framleis mange stadar. Men det gjekk greitt utan broddar i dag. 

Vel heime igjen var det tid for ein dukkart i sjøen. I dag heldt vatnet 4 grader! Så ja - det vart egentleg to kalde avrivningar i dag...😍😄

Foto Gjelsvikefjellet 081224

Desemberlys

Soloppgang over Holmedal i dag

Dokka og Moldura frå stien til Kleppenes-/Bogestølen og Bakkestølen

Flott utsikt mot aust frå toppen av Hekkelfjellet.
Vi ser m.a. f.v. Portafjellet, Vardenova, Blegja, Storehesten, litt av Eitrenipa og Fossedalshengenipa, N&S Kringla. t.h. ser vi innover Heileberget og fremst Smørskornova.

Dagens selfie på Hekkelfjellet

Bakkestølen på returen

Kleppenes/Bogestølen på returen

Nydeleg desembertur til Hekkelfjellet 708 moh i Holmedal i dag. Start ved vassverket. Første delen går opp stien mot Bakkefjellet, men held fram nordover til Kleppenes- og Bogestølen. Deretter til Bakkestølen og opp bakkane. Den siste ganske bratt. Så austover det kuperte fjellet mot toppen. Det er godt merka heile vegen sidan fjellet er post på fjelltrimmen i Askvoll sesongen 24/25. 

Veret var aldeles strålande. Nokre minusgrader hadde gjort stien og vasspyttar frosne. Sola steig opp over Holmedal og Dokka då eg kom eit stykke opp i bakkane. Lenger oppe skein bjørkeskogen i raudt! Nordover flatene mot stølane glimra Dokka og Moldura seg i flott desemberlys! 

Ved krysset til Bakkefjellet skein morgonsola i raudt

Ved Bakkestølen på veg opp.
Moldura og Fanafjellet i bakgrunnen.

Fjorårsgraset i den siste bratte bakken opp mot toppartiet var godt frosen. Eg slapp likevel å ta på meg broddane ved å "sjå meg føre"... Også på returen ned igjen. På toppen var det ein litt sur austavind, så eg tok å skifta til tørre klede og dunjakke. Det gjorde seg. 

På veg ned igjen gjorde eg meg ein pause på Bakkestølen. Nokre brødskiver og saft gjorde underverk. Fantastisk flott i den låge desembersola. Heilt super tur dette 😄   

Foto Hekkelfjellet 031224

Adventshelg i kjømda

Første sundag i advent nærmar seg med stormsteg. Så her er ein bildeserie for desember.

God adventshelg 🎄🎅