Nydeleg stolpejakt på Herland

Ein god matbit etter stolpejakta

Her er vi ved stolpen heilt i nord - fin utsikt til Alden

Tiril kosar seg på dei flotte berga vest på Atløy...
Kinn, Reksta, Skorpa og Store Batalden i synsranda.

...og dansar på ei flott bru eldsjeler har snikra - før dei tre bukkene Bruse kjem 😄

I dag reiste vi til Askvoll og tok ferja til Gjervik på Atløy. Vi det var Håvard & Tiril, Marie & Øyvind med Villemo og Tuva, Olaug og underteikna. Oppdrag - stolpejakt på Herland. Så vi køyrde ut på vestsida av øya og tok føre oss stolpane nordover langs kysten. Og som alltid før på Atløy var stien og merkinga heilt super. Blå gode merker som står tett. Ny plank utlagd over våte parti. Og heller somme stader. No har eg skrytt av merkinga, utlagde klopper og stein fleire gonger før på Atløy. Og nokre av dei finaste turane eg har hatt i kommunen har vore her ute. Sjå Creme de la Creme og ein TiTur link her. Merking er viktig - for som vi veit kjem havskodda veldig fort på ute ved kysten. Så det er ei stor sikkerheit at ein har utført så godt arbeid. På rein idealisme. Nok ein gong stor applaus til flinke eldsjeler👏

Elles må eg få nemne frå turen at småjentene til Marie og Øyvind var veldig flinke å gå. Dei gjekk omlag halve vegen nordover til Nordre Stølsvika der den siste svarte stolpen står. Det er nemleg eit stykke ut hit.Vi andre (sjå foto) heldt fram og fekk med oss alle stolpane før vi returnerte.  Vi hadde oss elles ein god matpause sør om Herlandsvatnet. Her står det ein god benk og bord. I det fine vèret var dette kjempeflott! 

Foto stolpejakt på Herland 010526

Arkivbilder frå Atløy 👇

Supert frå Eidsfjorden

Dagens selfie

Fisma og Eidsfjorden - bilen står midt i bildet ved vegen

Mot Dalsfjorden - Bakkevatnet midt i bildet

I dag tidleg parkerte eg ved Eidsfjorden og gjekk opp dei bratte bakkane til Eidsvatnet. Og vidare opp endå fleire bratte bakkar til Kalderasnipa og TiTur posten. Det vil seie eg fann ikkje TiTur Dalsfjorden posten på sjølve Kalderasnipa/ene, men på toppen eit stykke mot aust og nord for Dokka. Litt kortare dette når ein går opp Grønene frå Vikastølen, men litt lenger for meg! For i lett forvirra tilstand gjekk eg opp på begge toppane lenger vest før eg dilla meg til å sjå på appen kor eg kunne finne den berømte raude postkassen. I all beskjedenheit kan eg vel seie at eg har vore på Kalderasnipa før då... 😄. Men registrert meg fekk eg no😎 (Kanskje greitt å følge merking frå Vikastølen i Holmedal). 

Elles var det heilt vindstille til eg nådde opp på toppen. Og knall sol frå skyfri himmel. Med nydeleg utsikt til fjella vest i Askvoll, Fisma og til Dalsfjorden. Elles er det supert å gå opp frå Eidsfjorden no før det gror seg til i dei nederste bakkane. Du kjem deg fort opp i høgda! Under ligg foto og ein videosnutt. 

Foto Kalderasnipa 300426

Mai i bilder

Her er mai i bilder frå arkiv

Fjelltrim Kultingane

Eit minne frå Kultingane i ettermiddag

Moldura, Kalderasnipene og Dokka. Dalsfjorden og Bakkevatnet t.h.

Askvoll

Etter å ha vore på besøk i Skjolden i helga, og komne vèl heim igjen, tok Olaug og eg turen til Askvoll og gjekk på Kultingane. Ein av postane på årets utgåve av fjelltrimmen i Askvoll. 

Knusk tørt i terrenget no. Og Presteelva berre ei lita sitle! Elles grønkast det nede i Askdalen. Men lenger oppe er det berre brunt fjorårs-gras endå. Og snøen er heilt vekke. Det ligg berre litt igjen på Moldura og oppe i Dokka (bilde nr. 2). Verdt å nemne er det flotte arbeidet som har vore gjort på første delen av vegen ved Presteelva. Her går det fint å trille både barnevogn og rullestol no. Veldig bra!

Fantastisk fjelltrimdag

Dagens selfie 

Nydeleg utsikt til Rivedal, Straumsnes og Dalsfjorden

I dag gjekk turen til Rivedal og opp på fjelltrimposten til Askvoll idrettslag på Røyrbotnholten (link eigne bilder). Som eg skreiv her om dagen er det mange flotte triminitativ å vere med på om dagen. Stolpejakt og TiTur Dalsfjorden og så fjelltrimmen rundt om på dei høgste toppane i kommumen. Fjelltrimmen ligg ute heilt året. Både som registreing på app og på bøker. Applaus til alle som syter for dette!

Det var eit aldeles praktfullt vårvèr i dag. Sol frå skyfri himmel og vindstille. Dalsfjorden låg speglande vårglad. Og etter at bøane i Rivedal var sprøyta med gylle kunne ein formeleg sjå graset gro. Så flott! 

Eg parkerte ved den vanlege tilrettelagde parkeringsplassen ved kraftverket. Gjekk opp kraftvegen til demma. Morgonsola varma allereie i ryggen klokka 09.30! Vidare gjekk ruta over myrane vest om Lisetstølen. Her brukar det å vere ganske tungt å gå i all væta. I dag var det faktisk ganske tørt. Så gjekk turen vidare opp dei bratte bakkane på sørsida av fjellet og opp i DNT-stien som kryssar vest/aust frå Stongfjorden til Nipebu. Derette opp skåra på sørvest sida til toppen. Perfekt. Nydeleg utsikt. Og eg kunne kose meg med både skiver og Solo! Luksus! 

Eg sat vel ein god halv-time på toppen og naut livet. Nesten litt sjeldsynt å sitte slik på ein fjelltopp i strålande solskinn og vindstille i april 😎

Turen ned att gjekk same vegen. No med vårsola i ansiktet🌄Fantastisk følelse å kome seg opp i høgda denne dagen 😍

Trimprioriteringar

Mangevatna i grått vårvèr i dag tidleg

Tre havørner heldt meg med selskap

...ved Mangevatna

...og heime igjen

11.april gjekk TiTur Dalsfjorden26 og Stolpejakten av stabelen. I tillegg har vi fjelltrimmen som pågår heile året. Så, ja, vi har rikeleg med trimalternativ å vere med på om dagen. Av og til nesten litt "vanskeleg" å prioritere kva alternativ ein skal velge😎. I dag tok eg iallefall årets første besøk påTiTur posten oppe på Skylefjellet etter at registreringa starta. Nesten litt sjølvsagt sidan fjellet ligg på heimebane på nordsida av Stongfjorden.  

Det var overskya vèr i dag og god vårtemperatur. Og litt vind i høgda. Stien opp var forbausande tørr og fin. Eg valde å gå vegen ned igjen via Mangevatna og til Svartevatnet og heim. Kjekk tur! Og 1 besøk på TiTur registrert😁

Fotoserie Skylefjellet arkiv

Pensjonist-åra

På Møteplassen i Askvoll har vi det kjekt

Pensjonist-åra går. Og det har naturleg nok blitt mindre med fjellvandring. I alt slags vèr og vind. Til alle årets og døgnets tider. Eg har opplevd det meste slik sett. No blir det meir koseturar i bra vèr. Og gjerne ein dagleg trimtur i låglandet. Kanskje like greitt. Etter som det dreg seg til med fleire år på rumpa 😄.

I utgangspunktet var bloggen min ein rein turblogg. Med bilete og turopplevingar. Og gjerne som ein motivasjon til andre og nytte fjellområda til fysisk og psykisk fostring - som det heiter. I spesielle høve har eg likevel nytta bloggen min til andre ting. Som i dette tilfellet. 

Dei par siste åra har eg funne glede i å treffe "flokken" på Møteplassen. I dei flotte lokala til bibliotektet i Askvoll. Og gamlebanken. Som enkelte gjerne veit er eg nærast fostra opp i ein bokhandel. O.A.Skaar dreiv bokhandel i Dale i mange år - der for det meste mor mi, Målfrid og bestefar min Gustav, hadde den daglege drifta. Og så jobba eg nesten 40 år som bankmann. Så blant bøker og i (gamle) banklokale kan eg godt seie at eg trivast endå. 

To gonger i veka møtest vi på Møteplassen. Litt ulikt antal. Og mest menn. Praten går livleg. Om alt slags tema. Frå Trump til kommunale avgifter, straum, høyreapparat, vegar, vèr og vind og digitale problem. Om buforhold. Og politikk. Ja, knapt eit tema er utan diskusjon. Merkeleg nok har det aldri gått spesielt hardt føre seg i praten. Kanskje er det noko i uttrykket at vi har kome til sjels år og alder å gjere 😃. 

Under er forresten eit tema vi hadde føre oss her om dagen. Lagt fram av Einar Arne Herland. Veldig interessant. 

Eg vil på denne måten få takke Askvoll Røde Kors, Askvoll frivilligsentral og  Pensjonistforbundet i Askvoll som står for Møteplassen. Dette er verkeleg eit veldig flott tiltak de står føre. Så kan vi alltid håpe på at endå fleire dukkar opp på biblioteket mandag og onsdag klokka 10-12. Vi har alle behov for god sosial omgang. Kanskje endå meir di eldre vi blir. Vi har det veldig triveleg på Møteplassen (og kaffien og noko å bite i er nesten gratis😃). God helg!   

TiTur Dalsfjorden og Stolpejakt - oppstart

Skylefjellet er post på årets utgåve av TiTur Dalsfjorden - her er det flott utsikt til dei flotte Mangevatna 
Bildefilm Skylefjellet her 

Frå Kalderasnipa er det flott utsikt til Askvoll fjella i vest 
Bildefilm Kalderasnipa(ene) her

Både TiTur Dalsfjorden og Stolpejakta  startar opp i kommunane Askvoll og Fjaler i helga. Askvoll kommune har lagt ut følgjande info på sine heimesider. 

"Løypene på Stolpejakten er varierte og familievennlege – frå sentrumsnære turar til naturskjønne rundløyper. Stolpane er mellom anna plasserte i Kvammen, Stongfjorden, Askvoll, Holmedal, Rivedal, Atløy, Værlandet, Bulandet, Dale, Haugland og Ytre Fjaler".

God tur og God jakt!

Herleg påsketur

Dagens selfie

Mangevatna

Mangevatna med utsikt til Toreheia og Yndestadhøgeheia

Frå vèrmeldingane å dømme skal dagen i dag, Skjærtorsdag, vere den einaste dagen denne påska med fint vèr. Så heldigvis fekk eg bruke deler av denne til ein tur på Skylefjellet og Blåfjellet her heime. Eitt av dei finaste fjellområda i kommunen. Kortreist frå dørgotta. 

Etter ein dag med skikkeleg regnvèr i går, var det vått første biten opp til Rinda. Men eg hadde (sjølvsagt) teke på meg Scarpa fjellskoa for å halde meg tørr på føtene. Vidare frå Rinda til Svartevatnet låg det snø. Litt variabel mengde, men ca 10 cm på det meste. Her oppe tok dessutan nordavinden ganske friskt. Som vi veit er fjella på nordsida av Stongfjorden temmeleg eksponerte for alt slags vèr. Og vinden kan vere ganske så ekstrem. I dag var det vel berre frisk bris. Men temmeleg kald. 

På toppen av Skylefjellet bestemte eg meg for å gå vest til Blåfjellet òg. Så fekk eg meg ei litt lenger runde. Her ute sat eg ei stund litt i ly bak varden før turen gjekk inn att sørsida av Mangevatna. Og ned att same ruta eg kom opp her aust og heim igjen. 

Skylefjellet er ein av postane på årets utgåve av TiTur Dalsfjorden. Med oppstart 11.april. Merkinga frå skiltet ved vegen til toppen skal vere bra. 

Folk traff eg ikkje på turen før eg kom ned igjen til hovudvegen. Då fekk eg meg ein god prat med eit par frå Jølster som tenkte seg på Skylefjellet. For første gong. Dei fekk no ferske spor å gå etter. Herleg påsketur!

Foto Skylefjellet & Blåfjellet 020426

Bildefilm Northern Lakes, Stongfjorden

 

Nipebu i påska?

DNT-hytta Nipebu

Det nærmar seg påske, så her er eit liten trigger til å besøke DNT-hytta Nipebu og det fantastiske fjellområdet ikring. Her ligg info. I år er det bort i mot snøfrie forhold, så skiføre er her ikkje. 

Eg legg ved ein bildefilm eg laga for nokre år sidan. God tur! 

TiTur Dalsfjorden 2026

 

Via ruta frå Eidsfjorden til Kalderasnipa har ein fin utsikt til Askvoll

Kalderasnipa i midten sett frå søraust på veg til Dokka

Steiestølen frå ruta (Dyttinga) til Taket 

Frå Facebook sida til Titur Dalsfjorden kan ein lese følgjande:

Hei, lista til TiTurDalsfjorden 2026 er nå klar for å hente ned i ut.no og der vil de og sjå alle 10 registreringspunkta i kommunane våre. Lista og registrering i bøkene er satt fom 11 april og tom 11 september. Eg nemner her stadane samt lagar ein link slik at de kan hente dei opp her og. Her ser de turmåla, hugs at de og på dei fleste hente ned turforslag. Her er stadane:

Skylefjellet: https://ut.no/sted/141886698/skylefjellet

Veten på Atløy: https://ut.no/sted/146344572/veten-pa-atly

Straumsåsen: https://ut.no/sted/146890514/straumsasen

Kalderasnipene 662: https://ut.no/sted/146890261/kalderasnipene-662moh

Bjergastølen: https://ut.no/sted/146890239/bjergastlen

Nordre Klibberdalsfjellet: https://ut.no/sted/146890456/nordre-klibberdalsfjellet

Storlifjellet i Fjaler: https://ut.no/sted/146859786/storlifjellet-i-fjaler

Kallastølsfjellet/Kalvhagstølfjellet: https://ut.no/.../14689.../kallastlsfjelletkalvhagstlfjellet

Hellevikåsen: https://ut.no/sted/146890523/hellevikasen

Taket: https://ut.no/sted/143128/taket

Dersom spørsmål, ta kontakt

Helsing John Lien

Bildefilm Kalderasnipene

Bildefilm Skylefjellet 

Dette blir bra ...

Calella de Palafrugell

Katalonia 8 dagar i september - noko å sjå fram til...😎

• Vandretur fra Santa Susanna til
  Sant Pol
• Vandretur ved Montserrat klosteret
• Vandretur til Calella de Palafrugell
• Vandretur fra Vallromanes
• Vandretur i Garrotxa Nasjonalpark
• Byrundtur i Girona
• Besøk til fiskerlandsbyen
  
  Calella de Palafrugell
• Besøk til organisk vingård med
  
  vinsmaking
• Besøk til Garrotxa nasjonalpark
• Inngang til Montserrat klosteret
• Taubane i Montserrat
• Togbillett fra Sant Pol til
  Santa Susanna
• Lokal vandreguide
• Norsktalende reiseleder

 

•