søndag 19. desember 2010

Vinterselskap

Flott tur på Middagsnipa i dag tidleg

Det var ein perfekt søndagsmorgon. Frisk og ikkje altfor kaldt. 7-8 minusgrader. Klårt vèr med nokre høge skyer. Men viktigast av alt, vindstille. I dag ville òg Vigdis slå følgje. Så saman starta vi frå Vågeskardet og opp litt etter 9.30. Vi hadde begge med oss trugar til å ta på oss lenger oppe. For den lange bratte bakken mot første toppen, vest om Indrevågefjellet, er nesten snøfri. Med berre nokre centimeter nysnø.

Ho grein litt på nasa, følgjet mitt, då eg tok opp snarvegen min, gjennom nokre einerkavar, opp ei slukt, over nokre islagde hamrar og luks til himmels. Over stokk og stein..... Men eg har funne ut at eg sparer litt tid på dette, samstundes så kjem eg godt igang, tynnkledd som eg også var i dag. Ned på fire nokre gonger gjer seg det.... Med dette kom vi oss fort opp på kanten der vi fekk teke på oss trugane. 

 Soloppgang ved Portafjellet og Vardenova

Det var som sagt ein nydeleg morgon. Og når dei første solstrålane nådde oss rett nedanfor Indrevågefjellet, skjedde dette akkurat som planlagt. Perfekt følgje i sola austover til Middagsnipa. Nesten ikkje vind, og flott trugeføre. Noko skare, litt laussnø og fonner. Du ser på landskapet kor vèrhardt her er. Vinden feier ytene og mange fjellrabbar ligg bare i dagen. Polerte med is. Temmeleg vilt, og ikkje særleg gjestmildt hvis ein ikkje er kledd for det slike vinterdagar. 

Største problemet for ein halvgammal fyr i dag, var å høyre kva selskapet som var med, ytra seg om. Skare og trugar er ikkje akkurat ein lydlaus kombinasjon. Så det vart litt ekstra hææ og haa undervegs. Kunne jo ikkje godt stikke nasen opp i fjeset på sidemannen heller... Men vi nådde raskt og effektivt inn til varden. Vel nøgde.

 Vigdis på Middagsnipa i dag. Ytrevågefjellet.v.

Her skifta vi ein del sveittevåte klede, knipsa nokre bilder, og sette kursen vestover igjen. Framleis vindstille med solskinn sør frå Portafjellet. Sola laga fine skuggar i vindforma snøfonner. Perfekt vinterdag. Det var som eg sa til Vigdis -  vinterfjellet er fantastisk. Så lett å puste i den klåre og kalde lufta. 

Frå kanten og ned igjen tok vi av oss trugane. Og i den øvste snøfylte bakken sigla vi ned på rumpa. Liv og løye og snøsprut i andletet. Godt å kjenne gutungen i seg av og til. 

 Rumpesigling med snøsprut fjeset i minus 10 er friskt...:-)

Ein flott tur var over. Fin oppladning til familiebesøk og utveksling av presangar i Dale seinare på dagen. 

Fra Middagsnipa 191219

4 kommentarer:

Yeti sa...

Flotte bilder igjen!

Jag som trodde det mest regnade på Vestlandet, men solen verkar ju visa sig ganska ofta.

Unknown sa...

He he takk igjen Yeti. Vi har hatt ein fantastisk fin og kald vinter så langt. Sol, snø og is. Perfekt. Det har jo ikkje regna på lenge.... Vinteren i fjor var litt på samme måte. Det er ei myte at det regnar så mykje på Vestlandet...(trur eg...:-)))

Joe Newton sa...

I loved the switch from snowshoes to ass on the way down. Such a simple but fun way to travel!

Unknown sa...

Yes Joe! Exactly....:-) My Paramo Cascade is snowhite behind and goes like hell...:-)